МІНСК, 1 кас – Sputnik. Беларусь і Расія не збіраюцца захопліваць Чарнобыльскую атамную электрастанцыю, аб гэтым заявіў прэзідэнт Беларусі Аляксандр Лукашэнка на сустрэчы з генеральным дырэктарам МАГАТЭ Рафаэлем Грасі, перадае карэспандэнт Sputnik.
Беларускі лідар заявіў, што не разумее, навошта Украіна распаўсюджвае фэйкі на гэтую тэму.
"Мы на рознага кшталту авантуры не кідаемся. Я кажу гэта ў сувязі з тым, што апошнім часам нашы ўкраінскія "таварышы" і "сябры" ў СМІ шмат месца надаюць Чарнобыльскай атамнай станцыі. Даводзяць гэтую інфармацыю да вас, што мы (нібыта Лукашэнка), хочам захапіць Чарнобыльскую станцыю", - сказаў прэзідэнт.
Ён выказаў здзіўленне таму, што можа ляжаць у аснове падобных фэйкаў. Лукашэнка нагадаў, што Беларусь і так "нацярпеліся ад таго, што адбылося пасля выбуху гэтай атамнай станцыі, якую, заўважце, мы не будавалі, мы не абслугоўвалі і мы не ўзрывалі". Аднак "асноўная бяда" лягла на чвэрць беларускай тэрыторыі, і рэспубліка да гэтага часу змагаецца з наступствамі катастрофы.
"Таму я вас абсалютна запэўніваю, што гэта глупства поўнае, якое мяне нават здзівіла. Мы ў страшным сне нават не маглі ўявіць, што нам давядзецца "захапіць Чарнобыльскую атамную станцыю і за яе потым адказваць", - падкрэсліў Лукашэнка.
Кіраўнік дзяржавы запэўніў, што неабходнасці захопу ЧАЭС няма ні ў Мінска, ні ў Масквы.
"Няма такой неабходнасці ні з боку Беларусі, і, паверце мне, з боку Расіі таксама не было, няма і ніколі не будзе", - сказаў ён.
Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"