МІНСК, 10 кас – Sputnik. Ніжагародская вобласць гатова дапамагчы адрадзіць у Беларусі рачное суднабудаванне, паведаміў намеснік губернатара гэтага расійскага рэгіёна Ігар Зотаў на прэс-канферэнцыі ў мультымедыйным прэс-цэнтры Sputnik Беларусь у сераду.
Цяпер у Беларусі з афіцыйным візітам знаходзіцца прадстаўнічая дэлегацыя Ніжагародскай вобласці.
"Гаворка ідзе не проста аб лакальнай пастаўцы суднаў, а аб тым, каб адрадзіць суднабудаўнічую галіну ў Рэспубліцы Беларусь", - падкрэсліў Зотаў.
Паводле яго слоў, гэта маштабны праект, у якім зацікаўлены абодва бакі.
"Самы цікавы праект, за які мы вельмі моцна змагаемся, і спадзяемся на станоўчыя рашэнні, гэта праект у галіне суднабудавання", - сказаў намеснік губернатара.
Пры гэтым ён адзначыў, што ў Беларусі працягласць рэк складае тры з паловай тысячы кіламетраў, а існуючыя судны могуць хадзіць толькі па адной тысячы з іх. З улікам таго, што перавозка грузаў з выкарыстаннем суднаў з’яўляецца самым танным відам транспарту, беларускі бок разглядае гэты праект як выгадны і перспектыўны.
"Мы ведаем, што ў дзяржаўнай праграме Беларусі стаіць задача да 2026 года павялічыць у 10 разоў магчымасці перавозак суднамі, і ў сувязі з гэтым з Мінтрансам Беларусі мы дамовіліся супрацоўнічаць па трох ключавых напрамках", - сказаў Зотаў.
Першы напрамак – гэта стварэнне тэхнічнага флоту ў інтарэсах Беларусі, другі напрамак – гэта транспартныя судны, і трэці напрамак – круізныя судны, паведаміў ён.
Паводле слоў Зотава, ужо зараз абмяркоўваецца закупка такіх 10 суднаў і ўжо ўзгоднены тэхнічныя характарыстыкі.
"У нас ёсць і вытворчасць суднаў, і суднарамонтныя заводы, і кадравае забеспячэнне. І мы гаворым не толькі пра прамыя пастаўкі суднаў для Беларусі, а пра прамысловую кааперацыю. Бо ёсць пэўныя заводы ў Беларусі, і мы іх плануем задзейнічаць у гэтым вялікім і маштабным праекце", - дадаў намеснік губернатара.
Падрыхтуюць кадры для Беларусі
У сваю чаргу кіраўнік прадстаўніцтва Ніжагародскай вобласці ў Рэспубліцы Беларусь Андрэй Дудкін расказаў, што гэты суднабудаўнічы праект разглядаецца як глабальны.
"Кампетэнцыі нашага рэгіёна распаўсюджваюцца і на судапраектаванне, і на суднабудаванне, на рамонт, абслугоўванне суднаў. І самае галоўнае, мы захавалі ўвесь ланцужок падрыхтоўкі кадраў для суднабудавання – пачынаючы з сярэдніх спецыяльных прафесійных устаноў – рачнога вучылішча, да вышэйшай навучальнай установы, якая рыхтуе інжынераў і суднавадзіцеляў", - падкрэсліў ён.
Кіраўнік прадстаўніцтва звярнуў увагу на тое, што ў Ніжагародскай вобласці няма мэты проста пастаўляць судны ў Беларусь.
"Мэта ёсць уключыць у кааперацыю прамысловыя прадпрыемствы Беларусі, і самае галоўнае – за кошт тых кампетэнцый, якія ў нас ёсць, падзяліцца імі з беларускімі партнёрамі", - сказаў Дудкін.
Стратэгічнае партнёрства
Намеснік губернатара Ніжагародскай вобласці таксама адзначыў, што адносіны рэгіёна з Беларуссю маюць характар стратэгічнага партнёрства. Бакі рэалізоўваюць "праекты будучыні", якія ўносяць уклад і ў эканоміку Расіі, і ў эканоміку Беларусі, падкрэсліў Ігар Зотаў.
У першую чаргу размова ідзе аб развіцці сферы станкабудавання.
"З боку Расіі ёсць значны попыт на пэўныя групы станкоў, якія вырабляюцца ў Рэспубліцы Беларусь. У першую чаргу размова ідзе аб шліфавальных станках. Такія станкі вырабляюцца заводам "Чырвоны барацьбіт" у Оршы. Мы стварылі сумеснае прадпрыемства, каб пашырыць вытворчыя магчымасці завода. І робім яшчэ пляцоўку на ніжагародскай зямлі", - сказаў намеснік губернатара.
Зорны праект
Ігар Зотаў таксама назваў "зорным" сумесным праектам рэформу электратранспарту Ніжняга Ноўгарада.
"У 2022 годзе ў Ніжнім Ноўгарадзе мы запусцілі гэтую рэформу і нам удалося прыцягнуць дастаткова значныя аб’ёмы федэральнага фінансавання (…). І, разумеючы, што трэба будзе каласальны аб’ём закупак транспарту, мы дамовіліся з калегамі з "Белкамунмаша" (Мінск) аб лакалізацыі вытворчасці трамваяў і электробусаў на ніжагародскай зямлі – у Паўлава", - сказаў ён.
Паводле яго слоў, гэта будзе абсалютна ўнікальны з пункту гледжання тэрмінаў і арганізацыі вытворчасці праект, а трамвай будзе называцца "Минск – МиНин".
Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"