МІНСК, 21 кас – Sputnik. Пытанне будаўніцтва хуткаснай магістралі па маршруце Масква – Брэст практычна вырашана, заявіў прэзідэнт Беларусі Аляксандр Лукашэнка ў Палацы Незалежнасці на нарадзе, прысвечанай развіццю транспартнай інфраструктуры.
"З прэзідэнтам Расіі Уладзімірам Пуціным мы дамовіліся, што ў бліжэйшы час абмяркуем пытанні будаўніцтва хуткаснай магістралі праз Беларусь з Масквы на Захад. Да Брэста па крайняй меры", - цытуе Лукашэнку БелТА.
Паводле яго слоў, калі заходнія дзяржавы праявяць зацікаўленасць і прымуць удзел у праекце, то трасу можна працягнуць і да Берліна. У адваротным выпадку яна дойдзе да Брэста і назад.
"Гэта, можна сказаць, пытанне ўжо вырашана", - асабліва адзначыў беларускі лідар.
Гарады-спадарожнікі
Лукашэнка нагадаў, што беларускія ўлады прынялі рашэнне развіваць гарады-спадарожнікі сталіцы, каб разгрузіць горад. Цяпер трэба зрабіць так, каб з такіх гарадоў, як Дзяржынск, Заслаўе, Лагойск, Смалявічы, Фаніпаль і Рудзенск у Мінск можна было дабрацца яшчэ хутчэй.
"Нам трэба падумаць аб будаўніцтве больш хуткасных, незалежных ад аўтамабільных дарог, участкаў. Я не думаю, што гэта зойме шмат часу або вялікіх грошай", - лічыць ён.
На яго думку, да гэтых гарадоў можна правесці наземнае метро. Гэта стане плюсам для населеных пунктаў, таму што акрамя аўтамабільных будуць яшчэ дадаткова і чыгуначныя зносіны.
"Таму ў гэтым напрамку нам трэба рухацца, і ў наступнай пяцігодцы пытанні гарадоў-спадарожнікаў, асабліва Мінска, мы павінны вырашыць. Гэта павінна быць асобная праграма або падпраграма ў праграме "Дарогі Беларусі", - падсумаваў кіраўнік дзяржавы.
Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"