МІНСК, 22 кас – Sputnik. У дагаворы Беларусі і Расіі аб гарантыях бяспекі прапісаны парадак дзеянняў пры ўзнікненні рэальнай пагрозы суверэнітэту, заявіў расійскі пасол у Мінску Барыс Грызлоў.
Дыпламат растлумачыў, што ў дакуменце змяшчаецца парадак дзеянняў бакоў пры ўзнікненні рэальнай пагрозы суверэнітэту адной або абедзвюх дзяржаў.
"У духу саюзніцкіх адносін мы зыходзім з таго, што знешнія межы Саюзнай дзяржавы ўтвараюць адзіную абаронную прастору", - дадаў Грызлоў.
Пасол таксама праінфармаваў, што ў дагавор уключаны і палажэнні, якія звязаны з размяшчэннем па ўзгадненні лідараў дзвюх краін расійскай тактычнай ядзернай зброі на беларускай тэрыторыі. Ён растлумачыў, што зброя размяшчаецца ў Беларусі ў якасці "дзейснага інструмента ваеннага стрымлівання магчымых актаў агрэсіі, а таксама купіравання імкнення апанентаў учыняць правакацыі на заходнім флангу Саюзнай дзяржавы".
"У тэкст дагавора інтэграваны і некаторыя новаўвядзенні, агучаныя прэзідэнтам Расіі Уладзімірам Пуціным на нарадзе па пытаннях ядзернага стрымлівання 25 верасня", - адзначыў дыпламат у інтэрв’ю агенцтву РІА Навіны.
Ён таксама падкрэсліў, што абодва бакі "зноў пацвярджаюць ненакіраванасць узаемадзеяння ў сферы бяспекі супраць іншых дзяржаў і яго ажыццяўленне ў дакладнай адпаведнасці з мэтамі і прынцыпамі статута ААН і іншымі нормамі міжнароднага права".
"Гэты факт дадаткова пацвярджае абаронны характар дагавора", - канстатаваў Грызлоў.
Праца над дакументам
Паводле слоў дыпламата, зараз актыўна вядзецца работа з беларускім бокам па фіналізацыі тэкстаў гэтага дакумента, а таксама новай канцэпцыі бяспекі Саюзнай дзяржавы.
Гэтыя дакументы, паводле яго слоў, з’яўляюцца ў пэўнай ступені ўзаемадапаўняльнымі, але ў той жа час маюць свае асаблівасці.
Пасол растлумачыў, што канцэпцыя бяспекі СД з’яўляецца "ўсёабдымным дакументам дактрынальнага характару". У ім даецца канцэптуальная ацэнка няпростым зменам геапалітычнай сітуацыі і ролі СД у цяперашняй ваенна-палітычнай архітэктуры свету.
Ён таксама паведаміў, што неабходнасць абнаўлення гэтай канцэпцыі выклікана "нарастаннем глабальнай і рэгіянальнай нестабільнасці, а таксама намаганнямі, якія нашы стратэгічныя праціўнікі робяць для нанясення ўрону Расіі і Беларусі".
Паводле слоў Грызлова, канкрэтныя фармуліроўкі абодвух дакументаў з’яўляюцца прадметам ужо "чыставога" ўзгаднення кампетэнтнымі органамі дзвюх краін, але прынцыповае бачанне з абодвух бакоў, безумоўна, супадае.
"Застаюцца, што называецца, фінальныя штрыхі. Разлічваем, што падпісанне адбудзецца на чарговым пасяджэнні Вышэйшага дзяржаўнага савета Саюзнай дзяржавы ўжо да канца бягучага года", - адзначыў пасол.
Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"