Дзедмаробус і беларускі космас – у Гродне з’явілася алея крэатыўных ёлак

Замест снегу і марозу – алея ёлак ад народных дызайнераў будзе паднімаць настрой жыхарам Гродна ў бліжэйшыя тыдні. Некалькі дзесяткаў святочных дрэў, зробленых з самых нечаканых матэрыялаў, заззялі святочнымі агеньчыкамі ў парку Жылібера.

Алея крэатыўных ёлак – гэта публічны навагодні конкурс для гарадскіх прадпрыемстваў.

Творчыя супрацоўнікі кожны год будуюць свае навагоднія інсталяцыі. Часта выкарыстоўваюць прадукцыю і матэрыялы, якія вырабляюцца на іх прадпрыемствах ці ёсць у рабоце.

Напрыклад, сёлета ў ход пайшлі будаўнічыя блокі, пластыкавыя трубы, газавыя лічыльнікі, абутак, клубочкі нітак.

Сама ёлка, на думку канкурсантаў, не абавязкова можа быць калючай і "яловай". Яна можа быць у выглядзе зялёнага ўбору стройнай прыгажуні з галавой лялькі на верхавіне, зроблена са скручанай пластыкавай трубы, якая падобная на змейку, або сабраная з цеплаізаляцыйных дыванкоў.

Іншыя ўдзельнікі змясцілі ў цэнтр кампазіцыі муляж сучаснай бензакалонкі, дапоўніўшы яе гірляндамі.

Таксама на алеі можна ўбачыць ёлку з галовак сыру або ўпрыгожаную цацкамі з выявай планет і першай беларускай касманаўткі Марыны Васілеўскай.

А хтосьці і зусім замяніў ёлку на карту Беларусі, якая свеціцца.

Самай прыкметнай стала святочная інсталяцыя з сапраўднай маршруткай. Жоўтая "Газель" упрыгожана сняжынкамі, яловымі лапамі і падарункавымі каробкамі на даху. Яе прыпаркавалі на абочыне тратуара.

Многія ўдзельнікі конкурсу крэатыўных ёлак ператвараюць свае работы ў вялікія фотазоны. Дапаўняюць ялінкі лаўкамі і святочнымі фігурамі. Гараджане і турысты могуць прысесці, каб зрабіць эфектныя кадры.

Практыка паказвае, што лепш за ўсё ёлкі і навагоднія кампазіцыі ад народных дызайнераў выглядаюць увечары, калі ўключаецца ілюмінацыя. Тады ўсе работы выглядаюць святочна і па-навагодняму.

Усяго на алеі крэатыўных дызайнерскіх ёлак прэзентавана больш за 30 работ. Яны застануцца ў парку Жылібера да сярэдзіны студзеня.