Квэсты, светлавыя фігуры і навагодні экспрэс: куды звадзіць дзяцей на канікулах

Дзякуючы пераносу працоўных дзён сёлета на зімовыя канікулы прыходзіцца шмат выхадных. Гэты момант варта ўлічваць бацькам, якія збіраюцца звадзіць сваё дзіця на якое-небудзь навагоднюю імпрэзу.

Напрыклад, некаторыя музеі не працуюць у вялікія студзеньскія выхадныя, а білеты ў цырк ужо і зусім раскуплены. Аналагічная сітуацыя з тэатрамі – практычна не засталося білетаў на мюзіклы і лялечныя спектаклі. Тым не менш, варыянты пазабаўляць дзяцей усё ж ёсць.

Куды адправіцца за эмоцыямі і святочным настроем у Мінску – чытайце ў матэрыяле Sputnik.

На час зімовых канікул сталічныя музеі падрыхтавалі квэсты і спецыяльныя праграмы. Выбар залежыць ад пераваг дзіцяці – дзесьці прапануюць змайстраваць сваімі рукамі навагодні сувенір, дзесьці – адчуць сябе ў ролі сапраўднага дэтэктыва. Ёсць варыянты і для тых, хто захапляецца гісторыяй і любіць танцаваць.

Мастацкая галерэя Міхаіла Савіцкага запрашае на навагодні інтэрактыўны квэст "Свавольства старога дома", разлічаны на вучняў пачатковай школы. У сядзібным доме, які захоўвае шмат таямніц, дзеці сустрэнуцца з незвычайнымі персанажамі – мудрай Захавальніцай ключоў і Дамавухай. Гэта амаль дэтэктыўная гісторыя, у якой малыя стануць не проста гледачамі, але актыўнымі ўдзельнікамі.

Папярэдні запіс абавязковы. Удзел у мерапрыемстве абыдзецца ў 15 руб. (разам з сувенірам).

Адначасова з наведваннем квэста можна зазірнуць на выставу "Свет веера" з калекцыі Музея "Замкавы комплекс "Мір". На ёй вы даведаецеся не толькі пра гісторыю, але і практычнае прымяненне веера ў XVIII - пачатку ХХ стагоддзя. Кошт квіткоў для школьнікаў – 3 руб., для студэнтаў – 4 руб., а для дарослых – 5.

Для дзяцей больш старэйшага ўзросту – вучняў 5-8 класаў – у Археалагічным музеі падрыхтавалі навагодні квэст "Таемны пакой". Ужо зыходзячы з назвы зразумела яго канцэпцыя: ён спалучае ў сабе містыку і навуку.

Удзельнікі павінны выканаць цікавыя заданні ў экспазіцыі музея, знайсці сапраўдныя артэфакты і разгадаць гістарычныя загадкі.

Тут таксама абавязковы папярэдні запіс, кошт білета – 13 руб. (уваходзіць сувенір).

Яшчэ адно займальнае мерапрыемства напярэдадні Новага года пройдзе ў музеі "Лошыцкая сядзіба". Тут 29 снежня ў 12:00 адбудзецца экскурсія з танцавальным майстар-класам. Спачатку наведвальнікам раскажуць пра ўладальнікаў Лошыцкага маёнтка, пасля чаго госці паглыбяцца ў эпоху Адраджэння, Асветы і мадэрну і развучаць гістарычныя танцы – бранль, менуэт, падэграс. Галоўнае – не забудзьцеся ўзяць зручны абутак для танцавальных па.

Кошт білета – 8 руб. (для навучэнцаў і студэнтаў) і 15 руб. (для дарослых).

Адчуць святочную атмасферу і стварыць сваімі рукамі сувенір можна ў музеі "Дом Ваньковічаў. Культура і мастацтва першай паловы XIX стагоддзя". Тут да 15 студзеня будзе праходзіць тэматычная праграма "Каляды ў Ваньковічаў" з майстар-класам па вырабе навагодніх цацак і 3D-паштовак. Ствараць прыгажосць будуць пры дапамозе прыродных матэрыялаў – шышак, галінак, іншых драўляных частак, а таксама розных дэкаратыўных элементаў.

Наведаць майстар-клас могуць як дзеці, так і дарослыя. Кошт мерапрыемства: для навучэнцаў – 7 руб., для дарослых – 9 руб.

Для тых, хто любіць нешта "з разыначкай", прыдатны варыянт – адправіцца ў Калядны Дом. Гэта вялікая інтэрактыўная зона, дзе адначасова працуе больш за 10 пляцовак. Кожны год Дом мяняе сваю лакацыю – у гэтым ён размясціўся па адрасе праспект Машэрава, 15/1.

Адправіць пісьмо Дзеду Марозу, знайсці выхад у люстраным лабірынце, выкупацца ў магічным басейне, залезці ў домік мядзведзя і зладзіць там бой падушкамі – гэта далёка не ўсе забавы, якія чакаюць наведвальнікаў Каляднага Дома. Таксама тут можна абмяняцца падарункамі – папулярны гіфткросінг дабраўся і да гэтага месца.

Кошт квіткоў для дзяцей ад 5 да 14 гадоў – 30 руб. (для дзяцей ва ўзросце да 5 гадоў уваход вольны), для дарослых – 35 руб. Таксама ёсць ільготы для інвалідаў усіх груп і пенсіянераў. Для іх білет каштуе 15 руб.

Калі апрануцца цяплей, то можна адправіцца ў Батанічны сад. Тут усю зіму будзе дэманстравацца выстава гіганцкіх казачных светлавых фігур. Шчаўкунчык, Кот у ботах, Дзюймовачка, Папялушка, Гулівер, Чырвоная Шапачка – гэтыя і іншыя персанажы "пасяліліся" ў Садзе ліхтароў. У кожнай лакацыі ёсць музычнае суправаджэнне, якое яшчэ больш агортвае казачнай атмасферай.

Выстава даступная для наведвальнікаў у вячэрні час – з 18:00 да 22:00. Кошт квіткоў – ад 8 да 20 руб. Для ўдзельнікаў ВАВ, дзяцей са шматдзетных сямей, дзяцей да 4 гадоў, інвалідаў усіх груп уваход бясплатны.

Безумоўна, усе дзеці мараць убачыць галоўныя сімвалы Новага года – Дзеда Мароза і Снягурку. Каб зрабіць гэтую сустрэчу яшчэ больш запамінальнай, адпраўляйцеся ў захапляльнае падарожжа на "Навагоднім экспрэсе" Дзіцячай чыгункі.

Хлопчыкі і дзяўчынкі сустрэнуцца з Дзядулем Марозам і яго ўнучкай на лясной паляне станцыі Сасновы бор. Там іх чакае тэатралізаваны паказ з удзелам персанажаў з дзіцячых казак і мультфільмаў. Пракаціцца ва ўпрыгожаным вагоне можна 28, 29 і 31 снежня 2024 года, а таксама 1, 2, 4, 5 і 7 студзеня 2025 года. Кошт білета – 30 руб. (дзецям да года праезд бясплатны).

Дарэчы, у Мінску ёсць некалькі рэзідэнцый Дзеда Мароза. Так, казачны домік адчынены ў гандлёвым цэнтры "Першы нацыянальны гандлёвы дом" (пр-т Незалежнасці, 134).

У гэтай рэзідэнцыі сталічны Дзед Мароз будзе прымаць дзяцей да 7 студзеня. Час наведвання – у буднія дні з 14:00 да 21:00 і ў выхадныя дні – з 11:00 да 21:00. Таксама з 14 снежня на тэрыторыі гандлёвага цэнтра будуць праходзіць навагоднія мюзіклы, тэатралізаваныя анімацыйныя праграмы, майстар-класы.

Яшчэ адну часовую "прапіску" Дзед Мароз атрымае каля Нацыянальнай бібліятэкі. Яго рэзідэнцыя адчынілася 20 снежня і будзе працаваць да 7 студзеня. Таксама тут пройдзе буйны калядны кірмаш, будзе працаваць навагодняя пошта і святочныя фотазоны.

Яшчэ адзін чараўнік паселіцца ў Мінскім заапарку. Тут пабываць у гасцях у Дзядулі можна будзе да 30 снежня. Кошт наведвання Доміка з віншаваннем дзіцяці – 20 руб. (у кошт уваходзіць падарунак). Уваход у заапарк аплачваецца асобна.

Калі ёсць жаданне выехаць за межы Мінска і знайсці нешта цікавае, то такая магчымасць ёсць. Напрыклад, у цэнтры экалагічнага турызму "Станькава", што за 40 км ад сталіцы. Тут з 20 снежня па 7 студзеня будуць праводзіць навагоднюю праграму з удзелам Дзеда Мароза і Снягуркі. Акрамя гэтага хлопчыкі і дзяўчынкі могуць наведаць заапарк.

Усё гэта ўваходзіць у кошт уваходнага квітка – 15 руб. Дзецям да трох гадоў уваход бясплатны, таксама ёсць ільготы для шматдзетных сямей. За дадатковую плату можна пакатацца на квадрацыклах і конях. А малым – на восліках і поні.

Цікава і пазнавальна можна правесці час у гасцях у партызанскага Дзеда Мароза. Кожны год ён на тры месяцы атрымлівае "прапіску" ў мемарыяльным комплексе партызанскай славы "Хаваншчына" (Івацэвіцкі раён). Але каб з ім сустрэцца, абавязкова трэба запісацца загадзя.

Сёлета тут праводзяць інтэрактыўную экскурсію і захапляльны квэст для дзяцей і дарослых "Разведка шукае партызанскага Дзеда Мароза". Хлопчыкі і дзяўчынкі шукаюць Дзядулю, упрыгожваюць ёлку і разам выконваюць шмат цікавых заданняў, знаёмячыся з партызанскім лагерам.

Кошт экскурсіі – 8,70-10,90 руб., квэст – 8,70 руб.

Адназначна не варта на канікулах сядзець дома і бавіць час толькі ў гаджэтах. Калі пашанцуе са снегам, то можна ўспомніць і пра зімовыя забавы – зляпіць снегавіка або пакатацца на санках ды лыжах.