МІНСК, 3 сту – Sputnik. Беларускі ўрад прыняў рашэнне ўнесці карэкціроўкі ў візавыя правілы рэспублікі, адпаведная пастанова Саўміна №953 ад 16 снежня афіцыйна апублікавана на Нацыянальным прававым інтэрнэт-партале.
Сярод новаўвядзенняў, якія прадугледжаны гэтым дакументам, – электронная віза.
Візы будуць выдавацца ў аўтаматызаванай сістэме "Консул" "у рамках аказання электроннай паслугі па выдачы электронных віз з выкарыстаннем АПЭП ААІС (адзіны партал электронных паслуг агульнадзяржаўнай аўтаматызаванай інфармацыйнай сістэмы)". З заяўнікаў будзе спаганяцца пэўная плата за аказаную паслугу.
Такія візы будуць аднаразовымі і індывідуальнымі, іх будуць выдаваць на тэрмін не больш за 30 сутак.
Атрымаць электронную беларускую візу змогуць не ўсе іншаземцы – пастановай вызначаны пералік дзяржаў, грамадзяне якіх могуць на іх разлічваць.
Усяго ў спіску 67 краін. Сярод іх Аўстралія, Аўстрыя, Андора, Антыгуа і Барбуда, Барбадас, Бахрэйн, Бельгія, Балгарыя, Балівія, Боснія і Герцагавіна, Вануату, Ватыкан, Вялікабрытанія і Паўночная Ірландыя, Венгрыя, Германія, Грэцыя, Данія, Дамінікана, Інданезія, Ірландыя, Ісландыя, Іспанія, Італія, Канада, Кіпр, Калумбія, Рэспубліка Карэя, Кувейт, Латвія (у тым ліку неграмадзяне Латвійскай Рэспублікі), Літва, Ліхтэнштэйн, Люксембург, Малайзія, Мальта, Мексіка, Мікранезія, Манака, Нідэрланды, Новая Зеландыя, Нарвегія, Аман, Панама, Парагвай, Перу, Польшча, Партугалія, Румынія, Сан-Марына, Саудаўская Аравія, Паўночная Македонія, Сейшэльскія Астравы, Сэнт-Вінсэнт і Грэнадзіны, Сінгапур, Славакія, Славенія, ЗША, Уругвай, Фінляндыя, Францыя, Харватыя, Чэхія, Чылі, Швейцарыя, Швецыя, Эль-Сальвадор, Эстонія (у тым ліку асобы без грамадзянства, якія пастаянна пражываюць у Эстонскай Рэспубліцы) і Японія.
У залежнасці ад мэты паездкі электронныя візы будуць выдавацца па наступных катэгорыях: дзелавая паездка, удзел у спартыўных, культурных, навуковых, адукацыйных мерапрыемствах і стажыроўках, прыватныя справы, турызм.
Разгляд заяўкі на атрыманне электроннай візы будзе ажыццяўляцца на працягу сямі каляндарных дзён, магчымасць выдачы віз у тэрміновым парадку не прадугледжана.
Пры ўездзе ў Беларусь і ў час знаходжання ў рэспубліцы замежны грамадзянін па патрабаванні кампетэнтных органаў павінен прад’яўляць экзэмпляр электроннай візы ў электронным выглядзе або раздрукаваным на папяровым носьбіце.
Пункт пастановы аб электроннай візе пачне працаваць праз тры месяцы пасля афіцыйнага апублікавання дакумента.
Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"