МІНСК, 16 сту – Sputnik. Беларускі ўрад на тры месяцы ўвёў ліцэнзаванне вывазу белакачаннай капусты, яблыкаў, цыбулі рэпчатай, морквы і буракоў сталовых, гэта прадугледжана пастановай Саўміна №25 ад 15 студзеня, якая афіцыйна апублікавана ў чацвер на Нацыянальным прававым інтэрнэт-партале.
Згодна з дакументам, экспарт гэтай прадукцыі незалежна ад краіны яе паходжання будзе ажыццяўляцца па разавых ліцэнзіях.
Размова ідзе аб вывазе як у краіны ЕАЭС, так і ў краіны, якія не ўваходзяць у гэты саюз, "пры змяшчэнні тавараў пад мытныя працэдуры экспарту, часовага вывазу, перапрацоўкі па-за мытнай тэрыторыяй і рээкспартам".
Гэтае рашэнне не будзе распаўсюджвацца на тавары, якія вывозяцца з Беларусі для аказання міжнароднай гуманітарнай дапамогі іншым краінам, а таксама ў якасці харчоў.
Часовая забарона таксама не адаб’ецца на міжнародных транзітных перавозках, якія пачынаюцца і заканчваюцца за межамі Беларусі.
Разавыя ліцэнзіі будзе выдаваць МАРГ па ўзгадненні з Мінсельгасхарчам, аблвыканкамамі і Мінскім гарвыканкамам.
Як адзначылі ў прэс-службе беларускага ўрада, рашэнне аб выдачы ліцэнзіі будзе прымацца ўпаўнаважанымі органамі зыходзячы з ацэнкі суадносін свабодных рэсурсаў гэтай прадукцыі ў рэспубліцы і патрэбнасці краіны ў ёй на момант узгаднення ліцэнзіі.
"Пастанова прынята для забеспячэння ўнутранага рынку гэтай сельскагаспадарчай прадукцыяй у міжсезонны перыяд у поўным аб’ёме", - гаворыцца ў паведамленні Саўміна.
Рашэнні ва ўводзе ліцэнзавання на экспарт гэтай сельгаспрадукцыі ўлады Беларусі прымаюць ужо не першы раз.
У кастрычніку мінулага года ўрад ужо ўводзіў таксама на тры месяцы ліцэнзаванне вывазу з рэспублікі белакачаннай капусты, яблыкаў і рэпчатай цыбулі.
Потым у снежні было ўведзена аналагічнае ліцэнзаванне, але на вываз бульбы. На працягу трох месяцаў гэта прадукцыя будзе экспартавацца толькі па разавых ліцэнзіях незалежна ад таго, дзе бульба была вырашчана.
Як растлумачыў кіраўнік Саўміна Раман Галоўчанка, такія рашэнні прымаюцца, каб не дапусціць масавага ператоку беларускай сельгаспрадукцыі ў іншыя краіны, бо цэны на яе на знешніх рынках вышэй, чым у Беларусі.
Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"