МІНСК, 26 сту – Sputnik. Спробы фатаграфавання запоўненых бюлетэняў выбаршчыкамі былі зафіксаваны падчас датэрміновага галасавання, паведамілі ў Цэнтры па грамадскім назіранні за выбарамі.
"Усе працэдуры ў час датэрміновага галасавання выконваліся дакладна ў адпаведнасці з заканадаўствам. Вострых канфліктных сітуацый практычна не было. Адзінае, што можна адзначыць, гэта былі спробы фатаграфавання запоўненых бюлетэняў самімі выбаршчыкамі", - сказаў намеснік старшыні ФПБ Вадзім Грачоў.
Ён нагадаў, што раней была інфармацыя – у тым ліку ў СМІ – аб тым, што фатаграфаваць запоўненыя бюлетэні нельга.
Усяго, як адзначыў Грачоў, падчас датэрміновага галасавання ў Цэнтр па грамадскім назіранні за выбарамі паступіла каля 300 зваротаў, з якіх 75% датычыліся трох асноўных пытанняў: як прагаласаваць не па месцы рэгістрацыі, дзе знаходзіцца той ці іншы ўчастак і як арганізаваць галасаванне дома.
"Што да заўваг, якія выказвалі людзі, то яны, безумоўна, таксама былі. Напрыклад, камусьці не прыйшло запрашэнне на выбары, кагосьці не ўключылі ў спіскі для галасавання па месцы рэгістрацыі. Былі і асобныя моманты наконт уручэння сувенірных вырабаў упершыню галасуючым грамадзянам", - дадаў прадстаўнік Цэнтра.
Паводле яго слоў, у большасці заўвагі былі дастаткова суб’ектыўнага характару. Так, асобныя грамадзяне скардзіліся на рэжым працы ўчасткаў падчас галасавання. Таксама было некалькі выпадкаў, калі выбаршчыкі скардзіліся, што нельга прагаласаваць на любым участку без прывязкі да месца пражывання.
"З нестандартных сітуацый: былі нараканні, што на ўчастак нельга прайсці з сабакам і з аб’ёмнымі сумкамі, хоць, відавочна, што гэта пытанні бяспекі. Некаторыя абураліся, што нельга прагаласаваць анлайн або па пошце", - сказаў на заканчэнне Грачоў.
Асноўны дзень галасавання на выбарах прэзідэнта Беларусі праходзіць у нядзелю, 26 студзеня. З 21 па 25 студзеня ў краіне праходзіла датэрміновае галасаванне.
Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"