МІНСК, 10 лют – Sputnik. Улады Прыднястроўя адмовіліся ад фінансавай дапамогі Еўрасаюза па закупках газу, замест гэтага яны атрымаюць энергарэсурсы ад Венгрыі, паведаміў прэм’ер Малдовы Дорын Рэчан.
Раней еўракамісар па пытаннях пашырэння Марта Коc заявіла, што Еўрапейскі саюз гатоў выдзеліць яшчэ 60 млн еўра на пераадоленне энергетычнага крызісу ў Прыднястроўі.
"У сярэднетэрміновай перспектыве прапанова ЕС у памеры 60 млн еўра была рашэннем, якое дазволіла б пазбавіць Прыднястроўскі рэгіён ад шантажу і энергетычнай нестабільнасці. Аднак Ціраспаль адмовіўся ад гэтага рашэння", - сказана ў заяве Рэчана, апублікаванага ў Telegram-канале ўрада.
Паводле яго слоў, венгерская кампанія MET Gas and Energy Marketing AG ажыццявіць пастаўку газу на мяжу з Малдовай у рамках заключанага кантракта з Moldovagaz.
Кіраўнік малдаўскага ўрада таксама адзначыў, што ключавым патрабаваннем ЕС, з якім Ціраспаль не пагадзіўся, з’яўляецца паэтапнае павелічэнне тарыфаў для спажыўцоў.
Разам з тым Рэчан дадаў, што Малдова дазволіла транзіт газу ў Прыднястроўе пры выкананні шэрага ўмоў.
"Мы дазваляем гэты транзіт, а Ціраспаль зробіць некалькі крокаў, якія дэманструюць адкрытасць", - падкрэсліў прэм’ер.
Кішынёў у абмен на дазвол транзіту газу чакае ад Ціраспаля вызвалення палітвязняў, захавання малдаўскага грамадскага тэлебачання ў сетцы вяшчання і ліквідацыю кантрольных пастоў, якія былі ўсталяваны ў 2022 годзе. З 33 пастоў зараз застаюцца актыўнымі 11.
Сітуацыя з газам у Прыднястроўі
З пачатку года Малдова і Прыднястроўе засталіся без газу з-за спынення транзіту "блакітнага паліва" праз Украіну. У той час як Малдова атрымлівае энергарэсурсы ад еўрапейскіх краін (а гэта вядзе да росту тарыфаў для насельніцтва), Ціраспаль поўнасцю пазбавіўся магчымасці атрымліваць газ.
У Прыднястроўі былі ўведзены веерныя адключэнні электраэнергіі, у шматкватэрных дамах адсутнічала ацяпленне і гарачая вада, пры гэтым тэмпература на вуліцы апусцілася ніжэй за нуль.
Камісія па надзвычайных сітуацыях Малдовы 1 лютага зацвердзіла выдзяленне 20 млн еўра з гранта ЕС на закупку газу для Прыднястроўя. Дзяржаўны пастаўшчык Energocom пачаў неабходныя закупкі на еўрапейскіх біржах.
Малдаўская ДРЭС, якая знаходзіцца на тэрыторыі Прыднястроўя, у сваю чаргу аднавіла генерацыю электраэнергіі на газе.
Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"