МІНСК, 14 сак – Sputnik. Генеральная пракуратура Беларусі перадала ў Музей гісторыі Вялікай Айчыннай вайны папярэднія вынікі расследавання крымінальнай справы аб генацыдзе беларускага народа, паведаміў генпракурор Андрэй Швед.
У музеі гісторыі ВАВ сёння адкрылася абноўленая інтэрактыўная выстава "Генацыд беларускага народа". Тут можна ўбачыць не толькі матэрыялы справы, але і прадметы, знойдзеныя падчас раскопак у месцах масавых растрэлаў, канцэнтрацыйных лагераў і гета.
"Экспазіцыя будзе пашырацца, гэта першы крок, мы пастараліся перадаць папярэднія вынікі расследавання крымінальнай справы з таго пункту гледжання, каб на лічбах, на страшных фактах даказаць, што маштабы генацыду былі значна большыя, чым гэта гаварылася доўгія гады, у савецкі час", - заявіў генпракурор Андрэй Швед журналістам.
Наручнікі з Калдычэўскага лагера смерці
© Sputnik / Тамара Беляева
Паводле яго слоў, кожны трэці жыхар на акупіраванай тэрыторыі Беларусі быў знішчаны самым варварскім спосабам.
"Ні адна краіна свету не пацярпела ад генацыду, ад нацызму так, як Беларусь. Такіх маштабаў знішчэння людзей не ведала ні адна дзяржава", - падкрэсліў Швед, гаворачы аб тым, што прыйшлося перажыць беларускаму народу ў гады нямецкай акупацыі.
Наступствы гэтага генацыду да гэтага часу адбіваюцца на насельніцтве краіны, адзначыў ён.
"І зараз мы кажам, што яны (нацысты і іх памагатыя - Sputnik) не толькі забілі кожнага трэцяга, забілі сотні тысяч ваеннапалонных, замучыўшы зверскімі метадамі – яны забілі будучыню", - сказаў Швед.
Экспанат з выставы "Генацыд беларускага народа" ў музеі ВАВ
© Sputnik / Тамара Беляева
Паводле яго слоў, Генпракуратура Беларусі завяршыла навуковую працу, якая абсалютна адпавядае ўсім крытэрыям бясспрэчнасці, і ў ёй гаворыцца аб тым, што калі б фашысты не знішчылі насельніцтва ў гады ВАВ, то сёння беларусаў было б не менш як 17 мільёнаў.
"Гэта цана Перамогі і цана тых страшных злачынстваў, якія ўчынялі тут нацысцкія памагатыя", - падкрэсліў Швед.
Прэзентацыя кнігі
У пятніцу ў музеі гісторыі ВАВ таксама прайшла прэзентацыя кнігі "Генацыд беларускага народа. Злачынствы катаў 118 карнага батальёна".
Тлумачачы мэты выдання гэтай кнігі, генпракурор сказаў, што будучыя пакаленні павінны ведаць праўду пра мінулае, каб Беларусь магла развівацца як незалежная і моцная дзяржава.
© Sputnik / Тамара Беляева
"Вы ж бачыце, з чаго пачынаюць нашы ворагі: першае, што робяць – спрабуюць сказіць гісторыю. І не выпадкова апошняя рэдакцыя Канстытуцыі Беларусі замацавала абавязак па захаванні гістарычнай праўды і памяці", - адзначыў Швед.
У сувязі з гэтым ён падкрэсліў важнасць данесці да маладога пакалення "праўду аб Вялікай Перамозе і аб тым, што тварылі нацысты і іх памагатыя, якіх не першы год гераізуюць і ва Украіне, і ў Еўропе, і ў ЗША, і ў Канадзе".
Як расказаў кіраўнік следчай групы, якая займаецца расследаваннем крымінальнай справы аб генацыдзе, Валерый Талкачоў, у прэзентаваным выданні змяшчаецца поўная інфармацыя аб злачынствах карнікаў 118 батальёна, які, у тым ліку, спаліў Хатынь.
Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"