МІНСК, 18 сак – Sputnik. Праект стварэння саюзнага самалёта "Асвей" прасоўваецца па намечаным плане, заявіў журналістам першы віцэ-прэм’ер Расіі Дзяніс Мантураў у кулуарах XXXIV з’езда Расійскага саюза прамыслоўцаў і прадпрымальнікаў (РСПП).
"Мы павінны ў красавіку месяцы атрымаць тэхнічны выгляд", - сказаў Мантураў.
Раней паведамлялася, што вытворчасць гэтага самалёта вырашылі наладзіць у Баранавічах на базе ААТ "558 Авіяцыйны рамонтны завод". Гэта адзін з расійска-беларускіх праектаў па імпартазамяшчэнні.
Самалёт "Асвей" будзе двухматорным і зможа перавозіць 19 чалавек. Фактычна ён стане заменай L410. Такія машыны спачатку вырабляліся ў Чэхаславакіі, а затым у Расіі.
У рамках праекта па вытворчасці новай мадэлі паветраных суднаў РФ забяспечыць размяшчэнне фіксаванага заказу на выраб у Беларусі не менш як 178 фюзеляжаў самалёта, а таксама не менш як 89 самалётаў.
Пры гэтым частку спецыялістаў для вытворчасці самалётаў "Асвей" плануюць рыхтаваць ва Уфімскім універсітэце навукі і тэхналогій. Як чакаецца, расійскі бок падпіша пагадненне з баранавіцкім заводам для навучання васьмі студэнтаў.
Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"