Салют з гаўбіц упрыгожыць гімн на парадзе 9 мая

У беларускай арміі шмат сваіх традыцый, якія сыходзяць каранямі ў гісторыю. Самай гучнай у прамым і пераносным сэнсе застаецца салют. Толькі гэта вам не каляровыя карцінкі ў начным небе пад папулярную музыку.

Салютная група працуе на сапраўдных баявых гаўбіцах, толькі стрэлы ў іх халастыя – усё ж не вайна, а свята. Магутныя залпы гармат суправаджаюць дзяржаўны гімн, як вайсковы музычны акцэнт. Як рыхтуюцца да параду яго нябачныя ўдзельнікі, даведаўся карэспандэнт Sputnik.

Агучыць гаўбіцамі гімн Беларусі гонар выпаў салютнай групе, якая складаецца з курсантаў Ваеннай акадэміі. Цяпер з дня ў дзень яны бяруць удзел у рэпетыцыях парада войск Мінскага гарнізона.

Паводле яго слоў, удзел у парадзе, як і выкананне любой іншай дзяржаўнай задачы – гэта ўрачыста і ганарова для любога ваеннаслужачага. Таму адбор у групу сур’ёзны – трапляюць лепшыя з лепшых у вучобе.

"Яны павінны быць на вышыні", - асабліва адзначыў начальнік факультэта ракетных войск і артылерыі.

Вадзім Лабанаў расказаў, што ў Ваеннай акадэміі сапраўдны конкурс сярод артылерыстаў, каб трапіць у салютную групу. Камандзірамі разлікаў, як правіла, становяцца сяржанты, таму што яны самыя падрыхтаваныя. У разлікі трапляюць толькі курсанты, якія могуць якасна выканаць задачу.

Цяпер у салютнай групы праходзіць па тры рэпетыцыі ў тыдзень, у тым ліку адна з практычнай стральбой. Яны прайшлі ўжо сур’ёзную падрыхтоўку перад інаўгурацыяй прэзідэнта сёлета і святкаваннем Дня яднання народаў Беларусі і Расіі. Таму дзейнічаюць зладжана па адпрацаванай праграме.

Вадзім Лабанаў звярнуў увагу, што салют на Дзень Перамогі нясе асаблівую сэнсавую нагрузку, таму што такім чынам ваенныя аддаюць даніну павагі памяці воінаў, якія аддалі сваё жыццё, вызваляючы нашу Радзіму.

"Ёсць такая ваенная традыцыя, калі ганаровая варта страляе залпамі, каб увекавечыць памяць аб загінулых. Такая традыцыя страляць з гармат ёсць і ў нашай краіне. На парадзе мы такім чынам аддаём даніну памяці нашым дзядам і прадзедам", - нагадаў ён.

Начальнік факультэта расказаў, што салютная група складаецца з шасці 122-мм гаўбіц Д-30 – гэта стандартны артылерыйскі разлік. На парадзе яны адсалютуюць шасцю выстраламі кожная. Разам мінчане пачуюць 36 стрэлаў на ваенным парадзе.

Вядома, задаем "нечаканае" пытанне: а што будзе, калі салютная група не ўкладзецца па часе?

"Такога яшчэ не было", - сказаў кадравы артылерыст.

Яшчэ ні разу такога не было? (Перапытваем)

– Ні разу! - запэўніў ён.

І на трэніроўках? (Удакладняем яшчэ раз)

– Ні разу! - не здаецца Вадзім Лабанаў.

"Мы арыентуемся на працу аркестра ўвогуле і на дырыжора ў прыватнасці. Першым залпам мы павінны трапіць у пачатковыя ноты выканання гімна, а завяршыць апошнімі нотамі", - падзяліўся падрабязнасцямі начальнік факультэта.

Паводле яго слоў, на ўсё пра ўсё спатрэбіцца каля 56-58 секунд. Таму паміж залпамі будзе разрыў каля 9-11 секунд. У камандзіра разліку ёсць сувязь з дырыжорам, і яны пры дапамозе ўмоўных знакаў даюць зразумець адзін аднаму аб гатоўнасці працаваць.

Пытаемся, якія?

"Гэта ваенная тайна", - аджартаваўся Вадзім Лабанаў.

Разлікі гармат на парадзе будуць размяшчацца каля ракі Свіслач на звыклай для сябе пляцоўцы, адкуль гук цудоўна чутны гледачам парада.

Начальнік факультэта прызнаўся, што яму вельмі падабаецца гук салюту пад дзяржаўны гімн. Таму што гэта неперадавальны адрэналін, гэты гук нагадвае яму тыя гады, калі ён сам быў курсантам і выязджаў "у поле", каб страляць з гармат (ці, як кажуць прафесіяналы, націскаў на рычаг спуску).