МІНСК, 9 мая – Sputnik. Прэзідэнт Беларусі Аляксандр Лукашэнка павіншаваў суайчыннікаў з 80-годдзем Перамогі савецкага народа ў Вялікай Айчыннай вайне.
Ён адзначыў, што гэтая дата святая для беларусаў, яна дае падставу асэнсаваць урокі мінулага, задумацца аб каштоўнасці міру і аддаць даніну павагі тым, хто выратаваў чалавецтва ад фашызму, абараніў нашу незалежнасць і шчаслівую будучыню.
"У сэрцах удзячных нашчадкаў жыве памяць аб кожным з мільёнаў абаронцаў непакоранай Радзімы, хто быў закатаваны і забіты нацыстамі, самааддана змагаўся на фронце, у радах партызан і падпольшчыкаў, працаваў у тыле і пасля вызвалення адраджаў краіну з руін", - гаворыцца ў віншаванні.
Паводле слоў прэзідэнта, такі прыклад выключнай мужнасці і патрыятызму аб’ядноўвае, робіць мацней і натхняе сучаснікаў на стваральныя здзяйсненні на славу роднай Беларусі.
"Мы ганарымся адважным пакаленнем пераможцаў, і наш абавязак перад імі – берагчы мір на сваёй зямлі і захоўваць праўду аб далёкай вайне, папаўняючы яе летапіс зацёртымі часам імёнамі, падзеямі і фактамі", - падкрэсліў кіраўнік дзяржавы.
У 2025 годзе адзначаецца юбілейная дата – 80 гадоў з Дня Перамогі ў Вялікай Айчыннай вайне. У пятніцу, 9 мая, у беларускай сталіцы пройдуць святочныя мерапрыемствы. Галоўнай падзеяй дня стане ваенны парад, які адбудзецца вечарам каля стэлы "Мінск горад-герой".
Па ўсёй краіне таксама пройдуць канцэрты, на якіх будуць выконваць песні ваенных гадоў, адкрыюцца тэматычныя пляцоўкі.
Таксама 9 мая ў Беларусі апоўдні пройдзе хвіліна маўчання. Падчас яе па благаславенні кіраўніка БПЦ – мітрапаліта Веніяміна – у храмах і манастырах краіны ў памяць аб загінулых у гады Вялікай Айчыннай вайны прагучаць пахавальныя званы.
Увечары ў Мінску адбудзецца святочны салют. Месцы правядзення салюту глядзіце ў інфаграфіцы Sputnik.
Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"