МІНСК, 1 ліп – Sputnik. Прэзідэнт Беларусі Аляксандр Лукашэнка расказаў, чаму было прынята рашэнне змяніць параметры саюзных вучэнняў "Захад-2025".
Ён нагадаў, што побач з рэспублікай праходзяць ваенныя манеўры НАТА – "Абаронца Еўропы". Паводле яго слоў, іх маштаб і блізкасць да Беларусі – пагражальныя.
"Дваццаць пяць тысяч вайскоўцаў НАТА (гэта як яны заявілі) і каля 3 тысяч адзінак узбраенняў і тэхнікі літаральна за 10-15 кіламетраў ад нашай мяжы. Гэта нават не адлегласць аднаго кідка, гэта ўжо фактычна на нашай зямлі", - цытуе Лукашэнку яго прэс-служба.
Прэзідэнт заявіў, што Мінск не збіраецца рэагаваць на агрэсіўную дэманстрацыю сілы і робіць усё, каб знізіць градус напружанасці ў рэгіёне. У сувязі з гэтым прынята рашэнне змяніць параметры беларуска-расійскіх вучэнняў "Захад-2025".
"Мы знізілі колькасць войск практычна ўдвая, перанеслі месца іх размяшчэння ўглыб сваёй тэрыторыі. Далей ад мяжы на сотні кіламетраў", - растлумачыў беларускі лідар.
Раней міністр абароны рэспублікі Віктар Хрэнін адзначыў, што беларускія вайскоўцы пільна назіраюць за вучэннямі ў Еўропе, "спакойна сябе паводзяць і не рэагуюць".
Вучэнні "Захад-2025"
Беларуска-расійскія вучэнні "Захад-2025" пройдуць у верасні. Анансавалася, што ў манеўрах прымуць удзел больш за 13 тысяч вайскоўцаў.
На іх, як гэта было і ў папярэднія гады, плануюць запрасіць ваенных аташэ замежных краін, акрэдытаваных у Мінску. У Мінабароны заявілі, што Беларусь апавясціць усе дзяржавы аб мерапрыемствах, якія праводзяцца ў рамках гэтых манеўраў і запросіць назіральнікаў.
Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"