Галоўнае свята беларускай дзяржаўнасці ў горадзе над Сожам святкуюць з асаблівым размахам. Ва ўсіх раёнах арганізаваны святочныя пляцоўкі з рознымі лакацыямі і інтэрактывамі.
Адкрыццё сквера ў Гомелі
© Sputnik / Татьяна Федоренко
Пачалі святочны дзень з афіцыйных мерапрыемстваў – па вуліцы Савецкай прайшлі ветэраны, Героі Працы, моладзь, спартсмены, ганаровыя работнікі розных галін гаспадаркі. Далей на плошчы Працы адбыўся ўрачысты мітынг, прысвечаны Дню Незалежнасці Рэспублікі Беларусь і 81-й гадавіне вызвалення краіны ад немцаў.
"Сёння мы павінны быць разам, шанаваць мір і згоду, якія з’яўляюцца асновай нашага грамадства. Мы зрабілі свой выбар: жыць у незалежнай дзяржаве, і сёння ў нас ёсць усё, каб упэўнена рухацца наперад да росквіту", - падкрэсліла на мітынгу член Савета Рэспублікі, старшыня абласнога Савета дэпутатаў Кацярына Зянкевіч.
Што ў праграме?
Сем’і, моладзь, старэйшае пакаленне і турысты вывучаюць святочную праграму на гарадскіх афішах – ад разнастайнасці вочы разбягаюцца. Жадаеце бясплатны канцэрт заслужанай артысткі Расіі спявачкі Зары? Увечары яна выступіць на плошчы Леніна, а днём свае музычныя праграмы прадставяць лепшыя творчыя калектывы Гомеля.
Жадаецца творчасці? У скверы імя К.Тураўскага прапануюць паназіраць за працай мастакоў у рамках пленэру. За сувенірамі традыцыйна ўсе адпраўляюцца на Кіеўскі спуск, дзе кірмаш з унікальнымі вырабамі ручной працы разгарнулі рамеснікі з розных куткоў краіны.
Дзяўчыны ў святочных строях у Гомелі
© Sputnik / Татьяна Федоренко
Набярэжную сёлета ператварылі ў вялікую выставачную пляцоўку. На мальбертах і фотазонах – гісторыя станаўлення суверэннай і незалежнай Рэспублікі Беларусь. А сквер імя Грамыкі змянілі ў "Краіну дзяцінства" з казачнымі патрыятычнымі вуліцамі, гульнямі і фотазонамі. Тут жа вечарам бясплатна пакажуць кіно пад адкрытым небам. У добрай якасці фільмы з 12 да 22 гадзін будуць трансліраваць тры дні.
Завершыцца свята феерверкам і ўсебеларускай патрыятычнай акцыяй "Праспяваем гімн разам". У 22:55 да яе можа далучыцца кожны жадаючы ў любым кутку нашай краіны.
Традыцыя выконваць гімн на заканчэнне святочных мерапрыемстваў у гонар Дня Незалежнасці ўзнікла ў 2007 годзе. У патрыятычнай акцыі 18 гадоў таму прынялі ўдзел каля 620 тысяч беларусаў. Сёння яе маштабы значна шырэй.
Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"