МІНСК, 10 вер – Sputnik. Рашэнне Польшчы поўнасцю закрыць мяжу з Беларуссю выклікае сур’ёзную асцярогу для турыстычнай сферы, заявілі ў Рэспубліканскім саюзе турыстычнай індустрыі (РСТІ).
Напярэдадні польскі прэм’ер Дональд Туск заявіў, што ў ноч з 11 на 12 верасня Польшча закрые мяжу з Беларуссю.
"Для тураператараў гэта крытычна, таму што нават шасцігадзіннае спыненне на польскай мяжы ўжо прыводзіць да транспартнага калапсу, а закрыццё на суткі або даўжэй фактычна блакіруе аўтобусныя туры", - адзначылі ў РСТІ.
У турсаюзе ўдакладнілі, што для грамадзян, якія плануюць выезд з Беларусі ў Еўропу, ёсць некалькі магчымых рашэнняў у сувязі з сітуацыяй, якая склалася. Адзін са спосабаў – лагістыка праз Вільнюс з перасадкай на польскага перавозчыка.
Яшчэ адзін варыянт – маршрут праз Латвію, аднак эксперты называюць яго складаным. З 1 верасня Рыга ўвяла абавязковае анкетаванне для грамадзян трэціх краін, якія не маюць латвійскай візы або ВНЖ. Яны абавязаны запоўніць анкету на сайце eta.gov.lv не пазней як за 48 гадзін да ўезду або транзіту праз краіну. У адваротным выпадку – штраф да 2 000 еўра.
"Для групавых аўтобусных тураў гэтае правіла можа стварыць дадатковыя складанасці, бо кожны пасажыр павінен запоўніць анкету індывідуальна", - растлумачылі ў арганізацыі.
Трэці варыянт (самы радыкальны) – перанос туру, але ён магчымы, калі ва ўсіх турыстаў дзеючыя візы.
"Многія пасольствы цяпер адкрываюць візы пад даты туру і, калі яны ссоўваюцца, то візу давядзецца адкрываць нанова", - дадалі ў РСТІ.
Цяпер тураператары чакаюць афіцыйных тлумачэнняў і рыхтуюцца да альтэрнатыўных маршрутаў. Рэспубліканскі саюз туріндустрыі праінфармаваў, што збярэ сваіх членаў на кансультацыю 11 верасня, каб абмеркаваць сітуацыю, варыянты маршрутаў і сумесныя рашэнні.
Польшча закрывае мяжу з Беларуссю
Гэтае рашэнне набывае моц апоўначы з 11 на 12 верасня. Прычына такога рашэння – беларуска-расійскія вучэнні "Захад-2025", якія пачнуцца 12 верасня і завершацца 16 верасня.
Аўтобусныя перавозчыкі ўжо паведамілі аб адмене рэйсаў з Беларусі ў суседнюю рэспубліку. Пакуль няма дакладнай інфармацыі, на які тэрмін уводзяцца абмежаванні, аднак кіраўнік МУС Польшчы Марчын Кервінскі растлумачыў, што меры будуць мець часовы характар.
Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"