МІНСК, 22 сне – Sputnik. Мінгарвыканкам арганізуе больш за 700 святочных і пазнавальных мерапрыемстваў для школьнікаў горада на зімовых канікулах.
На пасяджэнні ў Мінгарвыканкаме адзначылі, што галоўная задача на гэтых канікулах – забяспечыць максімальную занятасць дзяцей і даць ім магчымасці для аздараўлення, вольнага часу, актыўнага і бяспечнага адпачынку.
Так, перад канікуламі запланавана правядзенне адзінага ўрока бяспекі для навучэнцаў школ з удзелам міліцыянераў, ратавальнікаў і супрацоўнікаў ТВВОД. Дзецям нагадаюць аб выкананні правіл бяспекі на канікулах.
Акрамя таго, 22 снежня для старшакласнікаў, якія дабіліся поспехаў у вучобе, творчасці і спорце арганізуюць традыцыйны навагодні баль. А 23 снежня ў Белдзяржцырку пройдзе дабрачынны навагодні паказ.
Усяго ў Мінску, у тым ліку і ва ўстановах адукацыі, будзе арганізавана больш за 700 святочных мерапрыемстваў для дзяцей і бацькоў.
"Падчас канікул, з 29 снежня па 6 студзеня, будзе арганізавана работа 265 школьных лагераў з дзённым знаходжаннем. У іх адпачнуць больш за 13 тыс дзяцей", - цытуе "Мінск-Навіны" старшыню камітэта па адукацыі Мінгарвыканкама Марыну Ільіну.
Па словах кіраўніка профільнага камітэта мэрыі, у рамках школьных лагераў для дзяцей прадугледжана трохразовае харчаванне, а таксама комплекс адукацыйных і выхаваўчых мерапрыемстваў.
Сталічныя ўлады праанансавалі адкрыццё гарадскога аздараўленчага лагера ў Цэнтры тэхнічнай творчасці дзяцей і моладзі. Магчымасць наведаць лагер будзе не толькі ў навучэнцаў цэнтра, але і школьнікаў з Заводскога, Ленінскага, Партызанскага раёнаў. Рабят чакаюць заняткі ў профільных лабараторыях і майстар-класы.
Старшыня Мінгарвыканкама Уладзімір Кухараў прапанаваў арганізаваць для школьнікаў экскурсіі на выставу дасягненняў "Мая Беларусь", адкрыццё якой адбылося 19 снежня ў Мінску.
Мэр таксама даў даручэнне камітэту па адукацыі распрацаваць да пачатку 2026 года навучальны курс па інфармацыйнай бяспецы для дзяцей.
Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"