Кіраўнік беларускіх католікаў распавёў Sputnik, чаму "дожджык" – яго любімае аздабленне, а таксама падзяліўся дзіцячай навагодняй гісторыяй і праспяваў навагоднюю песеньку.
"Калісьці мы ўпрыгажэнні на ёлку рабілі самі, на ўроках працы выразалі палоскі з каляровай паперы, склейвалі іх, і атрымліваліся доўгія рознакаляровыя ланцугі, выразалі цацкі, вешалі на ёлкі цукеркі, маленькія чырвоныя яблыкі", - расказаў мітрапаліт.
Архібіскуп успомніў, як доўгімі зімовымі вечарамі, у дні Адвенту напярэдадні Нараджэння Хрыстова дзеці рыхтавалі самаробныя ёлачныя цацкі, а потым упрыгожвалі прынесеную з лесу зялёную прыгажуню.
Ён таксама падзяліўся ўспамінамі аб тым, як разам з іншымі дзецьмі рабіў "хлебныя цукеркі" на ёлку.
"Маці давала цукеркі, мы іх развешвалі на ёлку. І ўвечары, калі ў доме выключалі святло, нам, дзецям хацелася цукерак, якімі была ўпрыгожана ёлка. Мы бралі па адной шакаладнай цукерцы, выразалі з хлеба квадрацік або прамавугольнік і загортвалі кавалачак хлеба ў фанцік, а цукерку з’ядалі", - распавёў мітрапаліт.
Па яго словах, дзеці былі ўпэўнены, што дарослыя не заўважаюць гэтай падмены.
"Знешне гэта не было прыкметна, як нам здавалася. І калі ўжо святы заканчваліся, маці казала, што трэба разабраць ёлку, і дазваляла з’есці ўсе цукеркі як узнагароду за нашу працу. Маці сыходзіла і ўсміхалася, а потым прыносіла новыя цукеркі. Адкуль яна гэта ведала, што мы іх ужо даўно з’елі, я да гэтага часу не ведаю", - усміхаючыся, расказвае святар.
Мітрапаліт расказаў, што напярэдадні Каляд і Новага года сам упрыгожвае ёлку, якая знаходзіцца ў епархіяльным упраўленні ў Мінску.
Пры аздабленні ёлкі ён выкарыстоўваў бардовыя, сінія, зялёныя шары, гірлянды і шмат "дожджыку". Менавіта гэты навагодні атрыбут, магчыма, зараз і не самы модны, яму нагадвае дзяцінства.
Пры гэтым мітрапаліт прызнаўся, што да гэтага часу, як і ў дзяцінстве лічыць, што на Новы год трэба марыць.
Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"