МІНСК, 3 вер – Sputnik. Імёны лаўрэатаў Нацыянальнай літаратурнай прэміі сталі вядомыя ўчора, у Дзень беларускага пісьменства. У конкурсе ўдзельнічалі 48 аўтараў, якія прадставілі творы ў сямі намінацыях.
У гэтым годзе прэмію атрымалі:
-
Казімір Камейша, "Высокі бераг" (Лепшы твор (зборнік твораў) паэзіі)
-
Васіль Шырко, "Я нязваны госць" (Лепшы твор прозы)
Георгій Марчук, "Святло вышыні. П'есы" (Лепшы твор драматургіі)
Зінаіда Дудзюк, "Пара высокага сонца" (Лепшы твор публіцыстыкі)
Іван Штэйнер, "Смехъ зъ болѣстию смешанъ будеть: смехавыя традыцыі Рэнесансу ў сатырычнай літаратуры ХХ стагоддзя" (Лепшы твор літаратурнай крытыкі і літаратуразнаўства)
Вольга Нікольская, "Похищение шедевра, или Новые приключения агентов "КолбаФирЖик" (Лепшы твор для дзяцей і юнацтва)
Юлія Алейчанка, "Пад чароўным шкельцам" (Лепшы дэбют)
Лепшы твор у кожнай намінацыі абярала экспертная камісія і журы конкурсу. Аргкамітэт Нацыянальнай літаратурнай прэміі складаўся з прадстаўнікоў міністэрстваў інфармацыі, адукацыі і культуры, а таксама Саюза пісьменнікаў Беларусі, Цэнтра даследаванняў беларускай культуры, мовы і літаратуры Нацыянальнай акадэміі навук Беларусі.
Папярэднікам Нацыянальнай літаратурнай прэміі лічыцца рэспубліканскі конкурс на лепшы літаратурны твор года, лаўрэаты якога атрымлівалі дыпломы і статуэткі "Залаты Купідон". Нацыянальная літаратурная прэмія была зацверджана ў 2015 годзе.
Напярэдадні абвяшчэння імён пераможцаў у Нацыянальнай літаратурнай прэміі з'явіўся свой сайт.
