ВІЦЕБСК, 21 вер — Sputnik. Экспазіцыя, на якой прадстаўлены работы Георгія Скрыпнічэнкі, размясцілася на адной з цэнтральных вуліц прама пад адкрытым небам, каб як мага больш аматараў жывапісу змаглі азнаёміцца з ёю.
Выстава рэпрадукцый сюррэаліста, якога называюць беларускім Сальвадорам Далі, стартавала ў рамках праекта "Мастак і горад", які дзейнічае ўжо сем гадоў. На працягу гэтага часу штогод у Мінску ладзяцца выставы розных жывапісцаў пад адкрытым небам.
"Асноўная мэта праекта заключаецца ў тым, каб распавесці людзям пра найбольш яркіх прадстаўнікоў беларускага жывапісу, і тое, што "Мастак і горад" упершыню выехаў за межы Мінска, на мой погляд, выдатна, паколькі павялічвае геаграфію нашага мерапрыемства і дазваляе пазнаёміцца з ім большаму колькасці людзей", — распавёў дырэктар Нацыянальнага цэнтра сучаснага мастацтва Сяргей Крыштаповіч.
Экспазіцыя зацікавіла жыхароў і гасцей горада. Як расказала карэспандэнту Sputnik Ірына, якая прыехала з Оршы "па працы", яна спецыяльна прыйшла паглядзець працы мастака, пасля таго, як убачыла рэпартаж пра выставу па тэлевізары.
Афіцыйна экспазіцыю адкрылі ў Віцебску 20 верасня, але працы Георгія Скрыпнічэнкі былі выстаўленыя на вуліцы раней, і жыхары горада маглі з імі азнаёміцца да адкрыцця.
"Я тут кожны дзень праходжу. У мяне нават ёсць любімая карціна, дзе жанчына з быкамі ў галаве. І яна прыгожая, і быкі ў тэму, таму што ніхто не можа ведаць, што адбываецца ў жанчын на галаве, якія быкі там водзяцца", — падзяліўся сваімі перажываннямі ад убачанага мінак, які не пажадаў назвацца.
Георгій Скрыпнічэнка вядомы тым, што не тлумачыць сэнс, які ўкладвае ў свае карціны, а дае гледачам магчымасць самім яго разгадаць. Таму да 6 лістапада жыхары Віцебска змогуць самастойна зразумець, што хацеў сказаць сваімі палотнамі вядомы беларускі мастак.
