12:25 19 кастрычніка 2019
«Радыё Sputnik»
  • USD2.04
  • EUR2.27
  • 100 RUB3.19
Кнігарня

Сталі вядомыя імёны лаўрэатаў прэміі Гедройца

© Sputnik Марына Серабракова
Культура
Атрымаць кароткую спасылку
2520

У гэтым годзе ўпершыню ўручылі ўзнагароду ў намінацыі "Выбар Алексіевіч" - пераможца атрымаў iPhone Xr.

МІНСК, 26 вер - Sputnik. Напярэдадні ў Палацы мастацтваў адбылася ўрачыстая цырымонія ўзнагароджання лаўрэатаў Прэміі Гедройца.

Першае месца "за канцэптуальнае ўвасабленне светаадчування сучаснага грамадства і эфектыўнае выкарыстанне авангардысцкіх тэхнік пісьма" заняў раман Іллі Сіна "Libido". Першае месца прадугледжвае грашовы прыз у памеры 14 тысяч беларускіх рублёў.

Другое месца дасталася Міхалу Андрасюку з кнігай "Поўня" "за адметную інтэрпрэтацыю нацыянальный міфапаэтычнай традыцыі". Ён адправіцца на шатдандскі востраў Готланд у літаратурную рэзідэнцыю.

Трэцяе месца атрымала кніга Алены Брава "Садомская яблыня" "за глыбіню сацыяльнай дыягностыкі сродкамі мастацкай літаратуры". Уладальніку літаратурнай бронзы арганізатары паабяцалі магчымасць выхаду аўдыёкнігі.

У гэтым годзе ўпершыню была ўручана ўзнагарода ў намінацыі "Выбар Алексіевіч". Нобелеўская лаўрэатка абрала пераможцам Сяргея Календу з кнігай "Часам панкі паміраюць".

Нагадаем, што ў шорт-ліст прэміі-2019 увайшлі "Поўня" Міхала Андрасюка, "Садомская яблыня" Алены Брава, "Часам панкі паміраюць" Сяргея Календы, "Libido" Іллі Сіна, "Вяртанне Ліліт" Юліі Шаровай, "Падарожжа ў БНР" Сяргея Шупы.

У склад журы ўключаны культуролаг, крытык і эсэіст Максім Жбанкоў; літаратуразнаўца і літаратурны крытык Жана Капуста; паэтка, перакладчыца, арганізатарка культурніцкіх праектаў Марыя Мартысевіч; празаік, літаратуразнаўца, першы намеснік старшыні Саюза беларускіх пісьменікаў Алесь Пашкевіч; празаік, архівіст, літаратуразнаўца, настаўніца Ганна Севярынец і літаратуразнаўца Анжэла Мельнікава.

На гэты раз прэмія стала абмяркоўвацца задоўга да цырымоніі ўзнагароджання яшчэ і таму, што беларускі пісьменнік Альгерд Бахарэвіч адмовіўся да ўдзелу ў конкурсе. Ён накіраваў у адрас сакратарыяту ліст з адмовай удзельнічаць у сёлятняй Прэміі і патлумачыў, што на гэта паўплываў шэраг прычын, "якія маюць як светапоглядны, так і творчы, а таксама асабісты характар".

Прэмія імя Ежы Гедройца заснаваная Беларускім ПЭН-Цэнтрам, Саюзам беларускіх пісьменнікаў і Польскім Інстытутам у Менску і ўручаецца за найлепшую кнігу ў жанры мастацкай i дакументальнай прозы. Узнагарода мае статус галоўнай незалежнай літаратурнай прэміі Беларусі. Яе пераможцамі станавіліся такія вядомыя беларускія пісьменнікі як Уладзімір Арлоў, Зміцер Бартосік, Павал Касцюкевіч і іншыя.

Тэги:
Літаратурная прэмія імя Ежы Гедройца, Беларусь

Галоўныя тэмы