МІНСК, 9 сту - Sputnik. Больш за 460 гандлёвых кропак і 320 аб'ектаў грамадскага харчавання адкрыліся ў Мінску ў мінулым годзе.
У чацвер аператыўнымі дадзенымі з журналістамі падзяліўся намеснік начальніка аддзела развіцця гандлю галоўнага ўпраўлення спажывецкага рынку Мінгарвыканкама Дзмітрый Пляханаў.
"Адкрыта 780 аб'ектаў, уключаючы 460 магазінаў сумарнай гандлёвай плошчай 70 тысяч квадратных метраў і 320 аб'ектаў грамадскага харчавання на 7,5 тысячы месцаў", - распавёў Пляханаў.
Паводле яго слоў, сталічная гандлёвая сетка папоўнілася, у прыватнасці, буйнымі аб'ектамі: так, на Ціміразева адкрыўся новы гандлёва-забаўляльны цэнтр, дзе з'явіцца больш за паўтары сотні магазінаў.
У Мінску таксама адкрыліся шэсць супермаркетаў розных сетак і амаль 170 магазінаў "крокавай даступнасці". Таксама адкрылася больш за 30 фірменных магазінаў беларускіх вытворцаў.
Прадстаўнік ГУПР Мінгарвыканкама адзначыў, што у 2019 годзе ў сталіцы прайшло 225 кірмашоў, з якіх больш за 150 былі сельскагаспадарчымі.
Па словах Пляханава, было забяспечана выязное абслугоўванне больш чым 300 агульнагарадскіх і спартыўных мерапрыемстваў, дзе прынялі ўдзел больш за 2,5 тысячы суб'ектаў гандлю і харчавання, тавараабарот якіх перавысіў 7,7 мільёна рублёў.
