МІНСК, 5 чэр — Sputnik. Старадаўні абрад "Перанос свечкі" адраджаюць жыхары вёскі Навінкі ў Калінкавіцкім раёне, паведамілі карэспандэнту Sputnik у Гомельскім аблвыканкаме.
Абрадавая "свечка" складаецца з абраза і спецыяльна вырабленай свечкі. Па традыцыі яна знаходзіцца па чарзе ў дамах усіх паважаных жыхароў вёскі па адным годзе. Сам абрад заключаецца ва ўрачыстым рытуале пераносу "свечкі" з хаты, дзе яна знаходзілася год, у дом да іншага гаспадару.
"Напярэдадні правядзення абраду жыхары вёскі прыходзяць у дом, дзе захоўваецца "свечка", моляцца, спяваюць акафісты, чытаюць духоўныя вершы, вячэраюць і разыходзяцца. Раніцай наступнага дня святар праводзіць службу, пасля чаго абраз выносяць з дому. Усе жадаючыя праходзяць пад ім. Лічыцца, што гэта абароніць іх ад гора і хвароб. Таксама мясцовыя жыхары вераць, што свечка ахоўвае дом і ўсю вёску ад няшчасцяў і стыхійных бедстваў", — распавялі ў аблвыканкаме.
У гэтым годзе аўтэнтычны абрад з Навінак павінен быць занесены ў Дзяржаўны спіс гісторыка-культурных каштоўнасцяў Беларусі як элемент нематэрыяльнай культурнай спадчыны.
Упершыню абрад "Перанос свечкі" згадваецца ў Іпацьеўскім летапісе ў 1159 годзе. У яго аснове ляжыць пакланенне агню як духу продкаў. Абрад прывязаны да свята Святой Тройцы і праводзіцца на другі дзень гэтага свята. Старадаўні рытуал мясцовыя жыхары праводзяць на працягу многіх пакаленняў.
