МІНСК, 6 чэр — Sputnik. Старадаўні драўляны касцёл святога Яўхіма згарэў у вёсцы Клюшчаны ў Астравецкім раёне, без храма засталося дзесяць навакольных населеных пунктаў, паведамляецца на сайце Рымска-каталіцкай царквы ў Беларусі.
Са слоў настаяцеля парафіі айца Анатоля Захарэўскага, пажар заўважылі мясцовыя жыхары раніцай у аўторак — каля 05:50, тады як яшчэ ў 04:00 храм быў цэлым — кіроўца ранішняга малакавоза не ўбачыў прыкметаў дыму ці агню.
"Касцёл быў драўляны, таму так хутка і згарэў — не выратавалі нават восем пажарных машын, якія прыехалі на месца", — паведаміў настаяцель.
Ён таксама адзначыў, што, паводле інфармацыі супрацоўнікаў МНС, зараз правяраюцца дзве версіі ўзгарання — кароткае замыканне электраправодкі і падпал.
Храм у Клюшчанах быў збудаваны ў 1726 годзе і дзейнічаў да 1948 года. У 1990-х касцёл аднавілі, паўторнае яго асвячэнне адбылося ў 1993 годзе.
