МІНСК, 23 сак – Sputnik. Экс-старшыня Белгазпрамбанка Віктар Бабарыка заявіў адвод суду, паведамляе карэспандэнт Sputnik з залы суда.
Другі дзень суда пасля працяглага перапынку пачаўся з таго, што асноўны абвінавачаны хацеў звярнуцца да суда з пісьмовай заявай, але старшынствуючы суддзя Ігар Любавіцкі забараніў яму гэты зрабіць.
Любавіцкі растлумачыў, што ўчора судом ужо быў вызначаны парадак допыту абвінавачаных, і Бабарыка не першы будзе даваць паказанні.
"Высокі суд прашу прабачэння, але ўсё-такі з улікам таго, што што ў мяне цяпер няма магчымасці рэалізаваць сваё права зрабіць заяву, я лічу, што ў мяне ёсць падстава заявіць адвод суду", - заявіў Бабарыка.
Адвакат Дзмітрый Лаеўскі, у прыватнасці, заявіў, што "абвінавачаны пазбаўлены права на тое, каб звярнуцца да суда з заявай, а адвакаты пазбаўлены права звяртацца з хадайніцтвам".
Другі адвакат Бабарыкі Наталля Мацкевіч падкрэсліла, што ён у заяве выказаў новыя акалічнасці па справе.
Адзін з адвакатаў іншых абвінавачаных выказала агульную думку абаронцаў і заявіла, што не бачыць падстаў для адводу суда.
Пракурор Сяргей Гіргель таксама заявіў, што "пераканаўчых довадаў для адводу суда няма". Сем астатніх абвінавачаных заявілі: "на меркаванне суда", калі суддзя іх апытваў пра тое, ці падтрымліваюць яны заяву Бабарыкі.
Суд пайшоў у дарадчы пакой.
Сёння пачаўся другі дзень судовага разгляду справы пасля вялікага перапынку.
Учора пракуроры скончылі чытаць абвінавачанне і фігуранты справы выказаліся па пытанні аб тым, ці прызнаюць яны віну. Адзіны, хто не прызнаў - гэта Віктар Бабарыка. Суд таксама зацвердзіў план судовага следства - у аўторак павінен пачацца допыт абвінавачаных. Экс-кіраўнік Белгазпрамбанка і яго адвакаты разлічвалі на тое, што ён, як асноўны абвінавачаны, будзе даваць паказанні раней усіх.
Але суд прыняў рашэнне, што Бабарыка будзе даваць паказанні практычна апошнім.
Менш за паўгадзіны
Калегіі па крымінальных справах спатрэбілася менш за паўгадзіны, каб прыняць рашэнне па заяве Бабарыкі аб адводзе суда.
Выйшаўшы з дарадчага пакоя, суддзя Любавіцкі заявіў, што была разгледжана заява абвінавачанага пра тое, што ён ставіць пад сумненне бесстароннасць суда.
Суддзя адзначыў, што суд адбываецца ва ўстаноўленым парадку і адхіліў заяву Бабарыкі аб адводзе. Любавіцкі заявіў, што ў судзе, як і было запланавана, пачнецца допыт абвінавачаных.
Першым у судзе пачалі дапытваць былога намесніка старшыні Белгазпрамбанка Дзмітрыя Кузьміча.
У чым абвінавачваюць Віктара Бабарыку?
Бабарыка, які ўзначальваў Белгазпрамбанк на працягу 20 гадоў, абвінавачваецца ў атрыманні хабараў арганізаванай групай асоб і ў легалізацыі даходаў, атрыманых злачынным шляхам, у абодвух выпадках - у асабліва буйным памеры.
Ён таксама абвінавачваецца ў тым, што два гады таму правёў фінансавыя аперацыі па набыцці двух капiтальных будынкаў у Мінску ў мэтах легалізацыі сродкаў, атрыманых злачынным шляхам. Яму пагражае да 15 гадоў пазбаўлення волі па ч.3 арт.430 "Атрыманне хабару" Крымінальнага кодэкса Беларусі.
Паводле абвінавачання, якое зачытана ў судзе, ядро злачыннай групы, якую Бабарыка стварыў са сваіх намеснікаў, сфармавалася да 2008 года. А да 2020 года экс-банкір каардынаваў дзеянні яе ўдзельнікаў, займаўся размеркаваннем роляў і прызначаў сумы незаконнага ўзнагароджання.
Справа Белгазпрамбанка
Сітуацыя вакол Белгазпрамбанка і яго экс-кіраўніка абвастрылася ў чэрвені мінулага года, тады ў галаўным офісе банка прайшлі вобыскі, якія правёў дэпартамент фінансавай міліцыі КДК. Была ўзбуджана крымінальная справа за нявыплату падаткаў і "адмыванне" грошаў, а экс-кіраўнік банка Віктар Бабарыка і шэраг топ-мэнэджараў былі затрыманы.
Расследаваннем справы займаўся КДБ. Нацбанк, у сваю чаргу, увёў у Белгазпрамбанку часовую адміністрацыю, якую ўзначаліла Надзея Ермакова. Асноўныя акцыянеры банка - Газпрамбанк і ПАО "Газпром" - назвалі прызначэнне беларускім бокам кіраўнікоў Белгазпрамбанка незаконным.
Чытайце таксама:
- Бабарыка ў судзе заявіў, што не прызнае віну ў поўным аб'ёме
- У Мінску аднавіўся суд па справе Віктара Бабарыкі
- Хтосьці захварэў: у судзе па справе Бабарыкі абвешчаны перапынак
