МІНСК, 22 кра – Sputnik. Судовы працэс па крымінальнай справе экс-кіраўніка Белгазпрамбанка і яшчэ сямі абвінавачаных працягваецца ўжо больш за два месяцы. У цяперашні час суд знаходзіцца на стадыі допыту сведак, якіх па справе праходзіць больш за 50.
Як адзначаюць эксперты, знаёмыя з ходам працэсу, цяпер "пачалася судовая руціна, якая бывае на кожным судзе".
Як перадае карэспандэнт Sputnik, у чацвер у судзе працягваюць даваць паказанні ў якасці сведак былыя і дзеючыя супрацоўнікі Белгазпрамбанка. Першымі ў судзе былі дапытаны сведкі, якія вялі пратаколы пасяджэнняў камісій і справаводства ў банку.
Пракуроры задавалі пытанні аб тым, як ішло галасаванне падчас пасяджэння "вялікага крэдытнага камітэта", як вяліся пратаколы, як прымаліся рашэнні, ці была практыка галасавання завочна.
Таксама пракуроры задавалі пытанні аб тым, ці ўносіліся ў пратаколы пасяджэнняў крэдытных камітэтаў недакладныя звесткі. Сведкі адказвалі адмоўна.
У суд нават выклікалі сведку, якая больш за 10 гадоў не працуе ў банку: яна вяла маніторынг унутранай сістэмы кантролю.
Як распавялі Sputnik, крыніцы, знаёмыя з ходам суда, допыт сведак можа доўжыцца яшчэ некалькі тыдняў.
"Да сярэдзіны траўня чакаем у судзе яшчэ аднаго сведкі, які знаходзіцца ў СІЗА КДБ. Павінен да гэтага часу паправіцца", - сказаў суразмоўца агенцтва.
Як раней паведамляў Sputnik, першымі далі паказанні ў якасці сведак пяць чалавек, якія праходзяць па іншай крымінальнай справе і ўжо амаль год знаходзяцца ў СІЗА КДБ.
Усе абвінавачаныя па справе на стадыі допыту сведак займаюць пасіўную пазіцыю: пытанняў сведкам, якімі раней кіравалі, не задаюць.
На пасяджэнні прысутнічаюць некалькі дзесяткаў чалавек, якія прыйшлі падтрымаць абвінавачаных.
Раней у судзе
Усе, акрамя галоўнага фігуранта, далі прызнальныя паказанні і прызналі віну. Бабарыка ў судзе працягнуў стратэгію абароны, якая была абраная ўжо на стадыі папярэдняга следства.
У дзень допыту ён прачытаў нарыхтаваную раней прамову, у якой заявіў пра тое, што лічыць сваю справу палітычна матываванай. Гаворка доўжылася каля 40 хвілін, пасля чаго ён заявіў, што больш даваць паказанняў не мае намеру і на пытанні ў судзе адказваць не будзе.
Па дадзеных следства КДБ, на базе Белгазпрамбанка пад кіраўніцтвам Бабарыкі дзейнічала арганізаваная злачынная група, якая выводзіла грошы за мяжу. Паводле абвінавачання, зачытанага ў судзе, ядро злачыннай групы, якую Бабарыка стварыў са сваіх намеснікаў, сфарміравалася да 2008 года, а да 2020 года экс-банкір каардынаваў дзеянні яе ўдзельнікаў, займаўся размеркаваннем роляў і прызначаў сумы незаконнага ўзнагароджання.
Бабарыка абвінавачваецца ў атрыманні хабару арганізаванай групай і легалізацыі даходаў, атрыманых злачынным шляхам, у абодвух выпадках - у асабліва буйным памеры. Яму ставіцца таксама ўчыненне ў 2018 годзе фінансавых аперацый па набыцці двух капiтальных будынкаў у Мінску ў мэтах легалізацыі сродкаў, атрыманых злачынным шляхам. Па інкрымінаваных злачынствах Бабарыку, у адпаведнасці з беларускім заканадаўствам, пагражае пазбаўленне волі на тэрмін да 15 гадоў.
Раней былы банкір адмовіўся заключыць пагадненне са следствам, каб паменшыць максімальнае пакаранне, сваю віну ў поўным аб'ёме ён не прызнаў.
Чытайце таксама:
- Вучыўся разам з Бабарыкам: у суд дастаўляюць сведак з СІЗА КДБ РБ
- Амаль 60 сведак: у судзе па справе экс-банкіра Бабарыкі ідзе допыт
- Хабары ў працоўных кабінетах: працягваецца суд па справе Віктара Бабарыкі
