МІНСК, 31 сак — Sputnik. Афрыканскі слон збег ва Украіне з грузавога аўтамабіля, які належыць беларускай транспартнай кампаніі і перавозіў жывёлаў венгерскага цырка ў Беларусь, паведаміў у чацвер Транспартны партал.
Інцыдэнт адбыўся ўвечары 29 сакавіка непадалёк ад украінскай мяжы: кіроўца мінскай кампаніі "Янстронг" вёз слана Маркіза з Венгрыі.
"Першы раз вёз слана, ніякіх дакладных прадпісанняў не было: калі карміць, колькі паіць і іншае. Пад'язджаючы да ўкраінскай мяжы, я пачуў спецыфічны гук, адчуванне было, што слон спрабуе выбрацца з кантэйнера", — цытуе партал словы кіроўцы.
Паводле дадзеных перавозчыка, слон здолеў адчыніць дзверы грузавіка, збіў кіроўцу з ног і пайшоў у лес.
Як паведамляе партал, кіроўца адразу звярнуўся ў паліцыю, але паколькі сітуацыя была незвычайнай, яго адразу праверылі на алкатэстары.
Апэратыўны дзяжурны памежнай службы паведаміў, што памежнікамі былі прыняты меры па выяўленні жывёлы. Зараз кампанія "Янстронг" кантактуе з памежнай службай Украіны, каб знайсці слана.
