БДУ падвёў вынікі залічэння на бюджэт: хлопцаў усё менш

© Sputnik / Виктор ТолочкоДзень кар'еры ў БДУ
Дзень кар'еры ў БДУ - Sputnik Беларусь
Падпісацца
Сярэдні конкурс на бюджэт па ўніверсітэце склаў 1,6 чалавека на месца – на адну дзясятую менш, чым годам раней.

МІНСК, 25 ліп — Sputnik. Вынікі залічэння на бюджэтную форму навучання падвялі ў Беларускім дзяржаўным універсітэце, паведамілі Sputnik у прэс-службе ВНУ.

Пакуль БДУ прыняў 2194 чалавека на 2207 бюджэтных месцаў — на некаторых спецыяльнасцях абвешчаны дадатковы набор. Усяго ж на навучанне за кошт сродкаў бюджэту прэтэндавалі 3585 чалавек, а сярэдні конкурс склаў 1,6 чалавека на месца.

Сярод першакурснікаў БДУ кожны чацвёрты (25,5%) скончыў сярэднюю школу з медалямі або ўстановы сярэдняй спецыяльнай адукацыі з дыпломамі з адзнакай, а 52% залічаных — выпускнікі ліцэяў і гімназій.

"Сярод залічаных 43% складаюць мужчыны і 57% жанчыны (у 2015 годзе — 44% і 56% адпаведна). У гэтым годзе за апошнія пяць гадоў зафіксаваны рэкордна нізкі паказчык выпускнікоў са сталіцы — 33,5% (у 2015-м — 34, 7%)", — адзначылі ў БДУ.

Самыя высокія прахадныя балы сярод прыродазнаўчых спецыяльнасцяў былі на прыкладной інфарматыцы — 364, інфарматыцы — 349 і актуарнай матэматыцы — 338 балаў.

Сярод сацыяльна-гуманітарных і эканамічных спецыяльнасцяў найвышэйшыя прахадныя балы былі на спецыяльнасцях "міжнародныя адносіны" — 382, ​​"міжнароднае права" — 382 і "лінгвакраіназнаўства" — 381.

Найбольшым попытам сярод творчых спецыяльнасцяў карысталася журналістыка: аўдыёвізуальная, вэб-журналістыка і друкаваныя СМІ.

Залічэнне на платную форму навучання пройдзе ў першай палове жніўня.

Стужка навiн
0