МІНСК, 5 вер – Sputnik. Інтэрактыўная карта з беларускімі дыялектамі з'явілася ў байнэце, зараз кожны можа не толькі даведацца пра разнастайнасць роднай мовы, але і паслухаць, як размаўляюць на ёй у розных мясцінах Беларусі.
Аўтары праекта Dialects — Іна Хоміч, Максім Хлябец і Аляксей Жук – распавядаюць, што вывучаць дыялекты яны пачалі са сваёй малой радзімы — Берасцейшчыны.
У апісанні праекта аўтары тлумачаць: адметнасць у тым, што карыстацца ім змогуць не толькі спецыялісты, якія вывучаюць дыялекты па графічных картах, але і звычайныя беларусы, якім цікава, як гучыць іх мова ва ўсёй сваёй разнастайнасці.
Стваральнікі праекта заклікаюць гараджан і вяскоўцаў размаўляць з роднымі, сябрамі, суседзямі і запісваць гаворку, а потым дасылаць аўдыёфайл, каб пашырыць карту. У планах аўтараў – сабраць як мага больш дыялектаў як на тэрыторыі Беларусі, так і на суседніх тэрыторыях, каб убачыць уплыў беларускай мовы на гаворку ў іншых краінах і яе распаўсюд за межамі нашай краіны.
