МІНСК, 15 сак - Sputnik. Кампанія "Яндэкс" назвала самыя папулярныя і незвычайныя пошукавыя запыты беларусаў пра сон.
Інтэрнэт-гігант прааналізаваў пошукавыя запыты беларусаў за 2018-2019 гады, прысвечаныя тлумачэнню сноў. Так "Яндэкс" змог высветліць, якія сны больш за ўсё хвалююць грамадзян краіны.
Часцей за ўсё беларусы шукаюць тлумачэння снам аб цяжарнасці. Таксама папулярныя запыты са словамі "чалавек", "памерлы", "дзіця" і "змяя".
Хвалююць беларусаў і сны, у якіх з'яўляюцца былыя. Пытанні таксама выклікае вобраз дома, а таксама рыба, зуб і муж.Часта гучыць у запытах тэма дабрабыту: да чаго сніцца купля нерухомасці, упрыгажэнні, машыны і іншае. Хочуць тлумачыць беларусы як страшныя сны, так і прыемныя - не толькі да чаго сняцца павукі, але і вожыкі.
"Некаторыя шукалі тлумачэнне сноў, звязаных са звышнатуральным: [да чаго сняцца вампіры], [да чаго сніцца экстрасэнс], [да чаго сняцца прывіды]. Трапляліся і пытанні, як прысніцца канкрэтнаму чалавеку: [як прысніцца хлопцу, які падабаецца] або [як прысніцца чалавеку на адлегласці] ", - дадалі ў "Яндэксе".Часам бываюць нечаканыя запыты. Як прыклад, у кампаніі прывялі "да чаго сніцца зубр у доме", а таксама "да чаго сніцца цяжарны мужчына".
Калі верыць пошукавым запытам, самыя папулярныя колеры ў снах у беларусаў - чорны і белы, ледзь радзей сустракаюцца чырвоны і сіні.
Цікавяцца беларускія карыстальнікі і тым, што значыць дзень, у які прысніўся сон.
