Выйшла новая Чырвоная кніга раслін: рызакарпон, кампілопус і медуніца

© Flickr / Oskar GranCampylopus flexuosus
Campylopus flexuosus - Sputnik Беларусь
Падпісацца
Знікаючых відаў у рэспубліцы, па словах навукоўца, становіцца больш.
МІНСК, 30 чэр —Sputnik. Новая Чырвоная кніга, прысвечаная рэдкім раслінам, выдадзена ў Беларусі, паведамляе "Зялёны партал".
Чацвёртае выданне кнігі было падрыхтавана ў выдавецтве "Беларуская энцыклапедыя" і надрукавана накладам 1,5 тысячы асобнікаў. У кнігу ўключана 303 віды раслінных аб'ектаў — на дзесяць больш, чым у папярэднім выданні.
"Знікаючых відаў сапраўды становіцца ўсё больш. Але ў той жа час нельга сказаць, што пашырэнне складу Чырвонай кнігі звязана з пагаршэннем стану прыроды", — цытуе партал словы старэйшага навуковага супрацоўніка лабараторыі флоры і сістэматыкі раслін Інстытута эксперыментальнай батанікі імя. В.Ф. Купрэвіча НАН Беларусі Аркадзя Скуратовіча.
Паводле яго слоў, ёсць віды, якія спачатку былі ў Чырвонай кнізе, але потым іх выключылі, а ў чацвёртае выданне ўнеслі зноў — напрыклад купальнік горны, прастрэл раскрыты (сон-трава).
Навуковец адзначыў, што ўсяго з дзікарослых раслін да ліку рэдкіх аднесена 18 новых відаў, сярод якіх шаўкоўнік Кауфмана, чубатка полая, вярба лапландская, гладыш шырокаліставы, медуніца вузкаліставая, грудніца звычайная, пальчатакарэннік жаўтлява-белы, рызакарпон геаграфічны, кампілопус звілісты, кладонія лістовая і іншыя.
Скуратовіч таксама паведаміў, што над складаннем дадзенага выдання працавалі больш за 20 супрацоўнікаў НАНБ. Па словах навукоўца, на чарзе —выхад прыкладання Чырвонай кнігі, прысвечанага рэдкім дзікім жывёлам: зараз да такіх аднесены ўжо 202 віды (у папярэдняй кнізе — 188).
Стужка навiн
0