МІНСК, 30 ліп — Sputnik. Надвор'е ў жніўні захаваецца няўстойлівым, а апошнія дні ліпеня прынясуць у Беларусь навальніцы і дажджы, паведаміла Sputnik галоўны сіноптык рэспубліканскага Гідраметцэнтра Святлана Рыбакова.
"Атмасферны фронт трохі выцесніць з нашай тэрыторыі спякоту — сярэдняя тэмпература паветра па рэспубліцы днём будзе вагацца ў раёне 22-29 градусаў цяпла. На выходных дажджы яшчэ захаваюцца, а ў панядзелак прыйдзе і новы актыўны атмасферны фронт", — распавяла Рыбакова.
Паводле дадзеных Гідрамета, па большай частцы рэспублікі да панядзелка будуць ісці дажджы і навальніцы, месцамі магчымы град і ўзмацненне парываў ветру да 15-20 метраў у секунду. Ці будзе непагадзь несці такія ж разбуральныя наступствы, сіноптыкі прадбачыць не могуць, аднак заклікаюць быць асцярожнымі.
Дажджы адступяць з тэрыторыі рэспублікі ў сераду, але спякота спяшацца ў Беларусь пакуль не будзе.
"Надвор'е ў жніўні будзе на адзін градус вышэй за норму, ападкі таксама чакаюцца ў межах нормы, але надвор'е будзе няўстойлівае па-ранейшаму. Будуць перыяды і пахаладання, і спякоты", — паабяцала Рыбакова.
