МІНСК, 4 сак - Sputnik. У бліжэйшыя дні ў Беларусі будзе ветрана, але цёпла, пра гэта сведчаць звесткі Рэспубліканскага цэнтра па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды.
У аўторак пятага сакавіка, па дадзеных спецыялістаў, амаль па ўсёй краіне пройдуць кароткачасовыя дажджы. Тэмпература паветра ў начны час складзе +1..+6°С, днём будзе знаходзіцца ў межах +4..+11°С. Раніцай і днём будзе дзьмуць моцны вецер паўднёва-заходняга і заходняга напрамку, парывы якога будуць дасягаць 15-20, а месцамі - 22 метраў у секунду (у сувязі з чым МНС аб'явіла штармавое папярэджанне).
У наступныя суткі крыху пахаладае: у сераду шостага сакавіка ноччу і раніцай па ўсёй краіне чакаюцца мокры снег і дождж, аўтамабілістаў папярэджваюць аб галалёдзіцы на асобных участках дарог. Моцны парывісты вецер захаваецца, а паветра ўначы астыне да -4..+3°С, днём жа прагрэецца да -1..+5°С, а на паўднёвым захадзе Беларусі тэрмометры пакажуць нават +8°С.
Па дадзеных Белгідрамета, у мінулыя суткі максімальная тэмпература паветра ў дзённыя гадзіны склала 0..+5°C, што на 4-6°C перавышае кліматычную норму. Паводле папярэдніх дадзеных на Gismeteo.by, увесь бягучы тыдзень будзе цёплым. Так, у Мінску ў другой яго палове будзе сонца, а тэмпература днём будзе дасягаць +10°С.
