Масленіцу святкавалі жыхары адразу чатырох вёсак: самога Обчына, а таксама з Атраднага, Рачэні, Закальнага. У іх так заўсёды - гуляюць разам, таму свята атрымліваецца вельмі цікавым, аб'ядноўвае традыцыі кожнай з вёсак.
У асноўным, свята не адрозніваецца ад іншых: пудзіла, якое згарае ў агні, сонечныя бліны, танцы вакол прыгожа аздобленага кола. Але ёсць некалькі ўнікальных традыцый, звязаных з бярозай. На яе вешаюць комін, які называюць "лушнік" - у яго загружаюць льнотрасту і падпальваюць. Па дыме з трубы судзяць, які ўраджай лёну будзе ў будучыні. А яшчэ вакол каранёў бярозы выкладваюць снапы саломы і падпальваюць - грэюць бярозе карані саломай і агнём, каб хутчэй растаў снег і бяроза пачала абуджацца.
Потым жанчыны растрасаць лён і закідваюць яго на бярозу. Робіцца гэта для таго, каб наступны ўраджай лёну быў добрым і кудзелістым. А чыя сям'я закіне лён на бярозу вышэй, тая і будзе першай сеяць лён вясной. І абавязкова трэба "пакарміць тварагом бярозу". Сыр ці тварог закідваюць на дрэва, каб хутчэй прыляталі птушкі і прыносілі на сваіх крылах вясну.
