МІНСК, 11 вер — Sputnik. Прэзідэнт Беларусі Аляксандр Лукашэнка лічыць неабходным "страсянуць" МАК і WADA і падкрэслівае недапушчальнасць дрэннага стаўлення да людзей з абмежаванымі магчымасцямі.
Беларуская дэлегацыя пранесла сцяг Расіі на цырымоніі адкрыцця Паралімпіяды ў Рыа-дэ-Жанейра ў знак салідарнасці з адхіленымі расійскімі паралімпійцамі. У Фомачкіна атрымалася прайсці каля чвэрці круга, перш чым сцяг быў канфіскаваны. У чацвер IPC ануляваў акрэдытацыю члена зборнай, і ён вымушаны быў вярнуцца з Рыа ў Беларусь.
Падчас сустрэчы з журналістамі на ўчастку для галасавання на парламенцкіх выбарах беларускі лідэр заявіў аб тым, што беларуская дзяржава і ён асабіста цалкам салідарныя з учынкам Андрэя Фомачкіна.
"Гэта салідарнасць, пратэст супраць несправядлівасці. І тут мы з расіянамі ў адной лодцы, падтрымліваем іх і будзем падтрымліваць", — сказаў Лукашэнка ў нядзелю журналістам у Мінску.
Ён падкрэсліў, што выступае прыхільнікам чыстага спорту. Інакш, паводле слоў прэзідэнта, Беларусь не зможа спаборнічаць з буйнымі дзяржавамі — Расіяй, ЗША і Кітаем.
"Пуцін правільна заўважыў — трэба трэсці МАК, мы ж не ведаем, што там адбываецца. Калі ў вас ёсць доказы (ужывання допінгу — Sputnik) — пакладзеце іх на стол", — сказаў прэзідэнт.
Кажучы пра тое, як беларускія паралімпійцы змаглі пранесці сцяг РФ на цырымонію адкрыцця, прэзідэнт распавёў, што "інвалідаў скруцілі, сцяг забралі".
Паводле слоў Лукашэнкі, "нельга крыўдзіць гэтых людзей (інвалідаў — Sputnik), яны і так пакрыўджаныя, бачаць нашы магчымасці, але не могуць жыць такім жыццём, як мы".
"Калі ў свеце прынята рашэнне дазволіць гэтым людзям займацца спортам, праводзіць алімпіяду, навошта мы іх гнабім?" — задаў пытанне прэзідэнт.
