МІНСК, 5 сне — Sputnik. Парламенцкая дэлегацыя Польшчы на чале з маршалам Польскага сената Станіславам Карчэўскім прыбыла ў Мінск, візіт прадоўжыцца два дні, паведамілі Sputnik у панядзелак у прэс-службе Савета рэспублікі Нацыянальнага сходу Беларусі.
Дэлегацыя польскіх парламентарыяў на чале са Станіславам Карчэўскім прыбыла ў Беларусь па запрашэнні Савета рэспублікі Нацыянальнага сходу Беларусі.
"5 снежня Карчэўскі сустрэнецца са старшынёй Савета рэспублікі Міхаілам Мясніковічам, а таксама старшынёй Палаты прадстаўнікоў Уладзімірам Андрэйчанкам", — паведамілі Sputnik у прэс-службе.
У панядзелак Карчэўскі таксама наведае Нацыянальную акадэмію навук Беларусі, сустрэнецца са старшынёй Палаты прадстаўнікоў Нацыянальнага сходу Беларусі Уладзімірам Андрэйчанкам.
Таксама польскія парламентарыі возьмуць удзел у пасяджэнні сесіі Савета рэспублікі, якое пройдзе ў другой палове дня, паведамілі ў прэс-службе.
У аўторак, 6 снежня, маршал сената Польшчы правядзе сустрэчу са студэнтамі і выкладчыкамі філалагічнага факультэта Беларускага дзяржаўнага універсітэта, выкладчыкамі школ Мінска, дзе вывучаюць польскую мову, паведамілі ў прэс-службе. У другой палове дня Карчэўскі наведае РНПЦ дзіцячай анкалогіі, гематалогіі і імуналогіі ў Бараўлянах, а таксама палацава-паркавы ансамбль "Нясвіж".
Плануецца, што ў ходзе візіту ў Мінск Карчэўскі падыме пытанне аб Саюзе палякаў у Беларусі і сустрэнецца з прадстаўнікамі беларускай апазіцыі, сказалі ў польскай дыпмісіі.
