МІНСК, 2 сак — Sputnik. Беларусь і Польшча 2 сакавіка адзначаюць 25 гадоў з дня ўсталявання ўзаемных дыпламатычных адносін паміж краінамі.
Архіў МЗС Польшчы ў гэтыя дні прэзентуе гістарычныя дакументы і фотаздымкі, прысвечаныя дадзенай падзеі.
Паводле паведамлення польскай амбасады, найбольш важным дакументам, які ўваходзіць у прадстаўленыя матэрыялы, з'яўляецца пагадненне аб усталяванні дыпламатычных адносін ад 2 сакавіка 1992 г. Яго падпісалі міністры замежных спраў Польшчы і Беларусі — Кшыштаф Скубішэўскі і Пётр Краўчанка, які знаходзіўся з візітам у Варшаве.
Усталяванне адносін
У даваенны перыяд у Мінску дзейнічала Генеральнае консульства РП, падначаленае пасольству ў Маскве. Установа працавала да 1939 г., яе апошнім кіраўніком быў Казімеж Рудзкі. У пасляваенны час (з 1972 г.) у Мінску дзейнічала таксама Генеральнае консульства ПНР.
У выніку палітычных змен 1989 і наступных гадоў, паступовага распаду Савецкага Саюза Польшча набыла незалежнасць, пачала будавацца беларуская дзяржаўнасць. 25 жніўня 1991 г. Вярхоўны Савет тагачаснай Беларускай Савецкай Сацыялістычнай Рэспублікі абвясціў аб незалежнасці. Праз некалькі дзён — 31 жніўня — Парламент Польшчы прыняў пастанову, у якой адзначалася, што "Сейм Рэспублікі Польшча з радасцю вітае абвяшчэнне незалежнасці Беларусі 25 жніўня 1991 г.", якое стала "рэалізацыяй памкненняў беларускага народа". 10 кастрычніка 1991 г. была падпісана Дэкларацыя аб добрасуседстве, узаемаразуменні і супрацоўніцтве, а шлях да ўсталявання дыпламатычных адносін адкрыў афіцыйны распад СССР у снежні 1991 г.
Узаемаадносіны былі ўсталяваны ў рамках пагаднення, падпісанага міністрамі замежных спраў 2 сакавіка 1992 г., што дазволіла абмяняцца дыпламатычнымі прадстаўнікамі (спачатку ў ранзе часовых павераных) і стварыць дыпмісіі ў Варшаве і Мінску.
У гэтым жа годзе — 23 чэрвеня 1992 г. — прэзідэнт Польшчы Лех Валенса і старшыня Вярхоўнага Савета Рэспублікі Беларусь Станіслаў Шушкевіч падпісалі ў Варшаве Дагавор аб добрасуседстве і прыязным супрацоўніцтве.
