Цырымонія адкрыцця выставы прайшла ў бібліятэцы ААН у рамках 74-й Генасамблеі арганізацыі ў Нью-Ёрку.
"Падчас свайго выступу Уладзімір Макей назваў Андрэя Грамыку архітэктарам сістэмы міжнародных адносін, які зрабіў значны ўнёсак у стварэнне ААН. Падкрэсліў вядучую ролю, якую Андрэй Грамыка адыгрываў у перагаворным працэсе па ядзерным раззбраенні, адзначыўшы, што ён і сёння з'яўляецца ўзорам прафесійных якасцяў для маладога пакалення дыпламатаў", - распавялі ў МЗС.
У сваю чаргу Гутэрыш назваў Грамыку чалавекам "вялікіх дасягненняў", прызнаўшы яго выключныя якасці як перагаворшчыка. Генеральны сакратар ААН звярнуў увагу, што ў сучасным свеце некаторыя краіны аддаюць перавагу вайне, а не галоўнаму лозунгу Грамыкі "лепш дзесяць гадоў перамоў, чым адзін дзень вайны".
Кіраўнік МЗС РФ параіў свету памятаць аб прынцыпах былога міністра замежных спраў СССР. "Я думаю, мы павінны памятаць пра гэта дзеля таго, каб наш свет працягваў рухацца ў напрамку, які быў зададзены бацькамі-заснавальнікамі Аб'яднаных Нацый" - сказаў Лаўроў.
