МІНСК, 25 лют - Sputnik. Міністр замежных спраў Беларусі Уладзімір Макей назваў мінулы год напружаным, але выніковым, такое меркаванне ён выказаў на пашыраным пасяджэнні калегіі МЗС.
Вынікі працы органаў дыпламатычнай службы за 2019 год падводзяцца ў аўторак у Менску.
"Мы здолелі захаваць, а месцамі істотна нарасціць тэмпы і аб'ёмы дыпламатычнай працы. Павялічылася інтэнсіўнасць і пашырылася геаграфія замежных візітаў на вышэйшым і высокім узроўнях", - сказаў Макей, яго цытуе БелТА.
Ён таксама звярнуў увагу на дынамічнае развіццё двухбаковага ўзаемадзеяння з замежнымі партнёрамі на ўсіх вектарах.
"Захоўваючы прыхільнасць безумоўнага выканання сваіх абавязкаў у адносінах да Расіі - нашаму стратэгічнаму саюзніку і асноўнаму гандлёваму партнёру, Беларусь працягнула ўмацоўваць пазітыўную тэндэнцыю да нармалізацыі адносін на еўра-атлантычным вектары", - адзначыў ён.
Умацавалі сувязі з многімі краінамі
Уладзімір Макей адзначыў і істотныя зрухі ў дыялогу з ЗША; паслядоўна умацоўвалася ўзаемадзеянне з краінамі Азіі, Блізкага Ўсходу, Афрыкі, Лацінскай Амерыкі, у тым ліку стратэгічнае партнёрства з КНР.
"У 2019 годзе мы таксама змаглі зрабіць наша ўзаемадзеянне з Еўрасаюзам яшчэ больш прагматычным, з яго выбудоўваннем ў разліку не на год-два, а на больш працяглую перспектыву. Традыцыйна інтэнсіўнымі заставаліся палітычны дыялог і двухбаковае супрацоўніцтва з краінамі СНД і Грузіяй, дзе мы працягнулі актыўна ўкараняць ўжо добра зарэкамендавалую сябе практыку ўмацавання міжрэгіянальных сувязяў з акцэнтам на гандлёва-эканамічны складнік", - адзначыў міністр.
Важныя ініцыятывы
Кіраўнік МЗС Беларусі нагадаў таксама аб важных прапанаваных Беларуссю ініцыятывах, накіраваных на стварэнне атмасферы даверу, змястоўнае напаўненне новага шырокага міжнароднага дыялогу па пытаннях бяспекі ("Хельсінкі-2") і фарміраванне на прыкладзе Беларусі "гісторыі поспеху рэгіянальнай бяспекі". Не зніжалася актыўнасць у працы МЗС і замежных устаноў па рэалізацыі іншых ініцыятываў.
"Паказальна, што найбольш знакавыя шматбаковыя задачы і ініцыятывы выходзяць за чыста ведамасныя рамкі і становяцца нацыянальнай справай. Маю на ўвазе, напрыклад, выкананне міжнародных абавязацельстваў у кантэксце ўстойлівага развіцця", - падкрэсліў Макей.
На яго думку, Беларусь прадэманстравала і працягвае дэманстраваць свой патэнцыял у забеспячэнні эфектыўнай работы інтэграцыйных аб'яднанняў - ЕАЭС, СНД, АДКБ, а таксама міжнародных арганізацый, перш за ўсё ААН і АБСЕ.
"Важным вектарам прыкладання нашых намаганняў заставаліся пытанні "візавай лібералізацыі", пашырэння дагаворна-прававой базы міжнароднага супрацоўніцтва, абароны законных правоў і інтарэсаў беларускіх грамадзян за мяжой. У 2019 года ў беларускія замежныя ўстановы за аказаннем рознага роду прававой дапамогі звярнуліся больш за тры тысячы нашых грамадзян", - сказаў міністр.
