МІНСК, 25 лют – Sputnik. Міністэрства замежных спраў Беларусі выкарыстоўвае юрыдычныя магчымасці, каб не дапусціць замежных дыпламатаў на судовыя слуханні "рэзанансных" спраў, паколькі іх прысутнасць можна расцэньваць як ціск на суд, заявіў у сераду афіцыйны прадстаўнік беларускага знешнепалітычнага ведамства Анатоль Глаз.
Паводле яго слоў, у рэспубліцы створаны ўмовы для адкрытасці судовых разглядаў, у тым ліку з прысутнасцю дыпламатаў і консульскіх работнікаў, калі аднім з бакоў з'яўляецца замежнік.
"Аднак у цяперашні час мы назіраем спробу ўкаранення заходнімі краінамі новай практыкі - практыкі ўздзеяння на суд праз дыпламатаў. Неабгрунтаваная прысутнасць замежных дыпламатаў на адкрытых судовых пасяджэннях па справах, якiя не тычацца іх грамадзян, з'яўляецца, па сутнасці, спробай скрытага ўдзелу ў прыняцці судовага рашэння шляхам аказання ціску на суд", - сказаў Глаз.
Ён таксама адзначыў, што такі ціск аказваецца не асабіста замежнікам, а дыпламатам як афіцыйнай асобай.
"Гэта значыць, гаворка ідзе пра дэ-факта ціск на суд з боку замежнай дзяржавы", - удакладніў прадстаўнік МЗС.
Глаз падкрэсліў, што такая практыка з'яўляецца непрымальнай, як і калектыўнае наведванне дыпламатамі судовых працэсаў па справах, не звязаных з грамадзянамі іх краін. Гэта можа разглядацца як злоўжыванне дыпламатычным статусам.
"Мы пакідаем за сабой права спыняць такія спробы з выкарыстаннем усіх юрыдычных магчымасцей, у адпаведнасці з нацыянальным заканадаўствам і міжнародным правам", - паведаміў прэс-сакратар МЗС.
Ён таксама заявіў, што наведванне дыпламатамі беларускіх няўрадавых арганізацый, у тым ліку афіцыйна не зарэгістраваных, у дачыненні да якіх вядуцца судовыя разборы, таксама выглядае сумніўна.
Чытайце таксама:
- МЗС РБ: парушэнні краінамі Захаду праў чалавека можна пералічваць гадзінамі
- Макей выказаўся аб антыдзяржаўнай дзейнасці некаторых паслоў ЕС
- У новай канцэпцыі знешняй палітыкі Беларусі ўлічаць пазіцыю Захаду - МЗС
