МІНСК, 29 сту — Sputnik. Складана ў Віцебску, дзе шмат прафесійных майстроў пэндзаля і вельмі моцная мастацкая школа, пратрымацца самавучкам. Аднак у 2017 годзе "Контуру" спаўняецца ўжо 70 гадоў. Гэта адно са старэйшых творчых аб'яднанняў не толькі Віцебшчыны, але і краіны, якое прымае актыўны ўдзел у культурным жыцці горада і нароўні з вядомымі мастакамі дэманструе свае дасягненні.
Чарговай выставай "Дванаццаць месяцаў" "Контур" пачаў святкаванне юбілейнай для калектыву даты і адначасова завяршае шэраг навагодніх i калядных мерапрыемстваў комплекса "Залатое кальцо горада Віцебска "Дзвіна".
А назва выставы гаворыць сама за сябе: у адной экспазіцыі адразу паказаны ўсе поры года, а таксама вобразы людзей, якія жывуць у навакольнай з імі прыродай.
