МІНСК, 16 ліп — Sputnik. Маштабны музычны фестываль SunDay для дзяцей і дарослых пройдзе ў Гродне 21 ліпеня, паведамілі арганізатары.
Фестываль SunDay 2018 з канцэртам, выставай аўто і забаўкамі для ўсёй сям'і адкрыецца ў будучую суботу апоўдні ля Юбілейнага возера.
Па словах арганізатараў, гасцей чакаюць забавы самага рознага кшталту. Напрыклад, для дзяцей тут пройдзе бясплатны квэст, будзе ўстаноўлена гіганцкая надзіманая сістэма з горкамі, правядуць майстар-класы і анімацыйную праграму з пачастункамі і прызамі, запусцяць бясплатны пакой віртуальнай рэальнасці.
Для дарослых падрыхтавалі экстрэмальныя забавы: ім прапануюць скокнуць з вышыні трэцяга паверха ў вялікую надзіманую падушку, падняцца са страхоўкай па стромкай сцяне або спусціцца на "тралее".
На трох сцэнах на працягу дня пройдзе мноства шоу і музычных выступленняў; вядучыя — Слава Камісаранка і Андрэй Ірха. На галоўным канцэрце, які пройдзе вечарам, можна будзе паслухаць сусветныя хіты Nirvana, Queen, AC/DC, Linkin Park, The Beatles, Metallica і не толькі. Закрые мерапрыемства начны Open Air.
Квіткі на SunDay пакуль даступныя па 12 рублёў, аднак па меры набліжэння фестывалю іх кошт будзе расці.
