Пагадненне паміж Беларуссю і Еўрасаюзам аб спрашчэнні візавага рэжыму будзе падпісана пасля завяршэння ўнутрыдзяржаўных працэдур, пра гэта напярэдадні заявіла кіраўнік прадстаўніцтва ЕС у нашай краіне Андрэа Віктарын.
Ці варта беларусам спадзявацца на тое, што ўжо зусім хутка можна будзе наведваць Еўропу, атрымаўшы недарагую шэнгенскую візу? На гэтае пытанне радыё Sputnik адказаў палітычны эксперт, старшыня дыскусійна-аналітычнай супольнасці "Мінскі дыялог" Яўген Прэйгерман.
"Наўрад ці ўчорашняя заява Андрэа Віктарын кажа пра тое, што ёсць нейкія прарывы ў адносінах Беларусі і Еўрасаюза, усё ідзе ў паступовым, паступальным рэчышчы, аднак у частцы зместу апошніх прынятых дакументаў па візавым рэжыме і рэадмісіі мы выйшлі на фінішную прамую, засталося толькі замацаваць гэтыя пагадненні на паперы, а спрэчныя пытанні фактычна зняты", - сказаў Прэйгерман.
На думку эксперта, пасля ўступлення на пасаду новага літоўскага прэзідэнта Гітанаса Наўседы з'яўляецца надзея на паляпшэнне не толькі двухбаковых адносін Беларусі і Літвы, але і на далейшы прагрэс у адносінах з Еўропай, на якія моцна ўплывала жорсткая пазіцыя папярэдняй адміністрацыі Далі Грыбаўскайтэ.
Каментар Яўгена Прэйгермана слухайце ў аўдыёзапісе на радыё Sputnik Беларусь.
