Святары заклікаюць вернікаў не блытаць пост і дыету, а таксама не аддавацца нудоце падчас Вялікага посту перад Вялікаднем.
Праваслаўныя вернікі сышлі на самы доўгі са шматдзённых пастоў, устаноўленых царквой, які будзе доўжыцца 40 дзён да самага Вялікадня.
Галоўнае ў посце — малітва, духоўнае ачышчэнне. Пост — гэта не проста забарона на пэўную ежу, а унікальны духоўны досвід. Святары нагадваюць, што пост і дыета — гэта цалкам розныя рэчы.
Святыя айцы заўсёды казалі: "Ешце ўсё, толькі адзін аднаго не ежце", а ў Святым Пісанні гаворыцца: "Калі посціце, не будзьце заняпалыя, як крывадушнікі". Вялікі пост не сумяшчальны з тугой і смуткам, гэта час чакання самай светлай падзеі - Уваскрасення Хрыстова.
Вялікі пост — самы старажытны з царкоўных пастоў, ён складаецца з чатырохдзесятніцы — 40 дзён. Вернікі захоўваюць гэты пост з асаблівай строгасцю — не ўжываюць мяса, віна, малака, сыру і яек. Выключэнне складаюць людзі сталага ўзросту, хворыя, маленькія дзеці, цяжарныя жанчыны, а таксама вандроўцы.
Светлая Хрыстова Нядзеля выпадае ў праваслаўных сёлета на 19 красавіка.
