МІНСК, 7 кас — Sputnik. Нобелеўскую прэмію міру ў 2016 годзе атрымаў прэзідэнт Калумбіі Хуан Мануэль Сантас.
Прэзідэнт Калумбіі атрымаў прэмію за свае перамовы з рэвалюцыйнымi ўзброенымі сіламі Калумбіі аб міры ў краіне. Пры гэтым, у мінулую нядзелю народ краіны адхіліў вынесенае на рэферэндум пагадненне аб міры з РУСК.
"Гэта не значыць, што на рэферэндуме прагаласавалі супраць міру", — адзначылі ў Нобелеўскім камітэце і дадалі, што прэмія — знак памяці ўсім ахвярам грамадзянскай вайны ў Калумбіі і даніна павагі ўсім жыхарам краіны.
Грамадзянская вайна працягваецца ў Калумбіі з 1964 года. Супраць афіцыйных уладаў краіны змагаюцца баевікі РУСК, якія маніфестуюць камуністычныя погляды. Прэзідэнт Сантас вядзе перамовы з лідэрамі арганізацыі ўжо чатыры гады.
Сантас стаў не першым кіраўніком дзяржавы, які атрымаў прэмію міру. У розныя гады прэмію міру атрымлівалі прэзідэнты ЗША, Міхаіл Гарбачоў і многія іншыя палітычныя дзеячы.
