БРЭСТ, 21 сак — Sputnik. Да Дня Перамогі ў равеліне №2 Кобрынскага ўмацавання Брэсцкай крэпасці размесціцца намётавы лагер для ўдзельнікаў акцыі "Бессмяротны полк", паведаміў Sputnik другі сакратар гарадскога камітэта ГА "БРСМ" Пётр Піцко.
Палажэнне аб правядзенні міжнароднага патрыятычнага форуму "Бессмяротны полк" у Брэсцкай крэпасці ўжо адобрана Брэсцкім гарвыканкамам. Лагер будзе працаваць два дні 8 і 9 траўня.
"Гэта праводзіцца ўпершыню, такога не рабіў яшчэ ніхто на постсавецкай прасторы. Прагназаваць, наколькі ідэя будзе запатрабаваная, мы не можам. На першым пастраенні "Бессмяротнага палка" мы сабралі 70 чалавек, у мінулым годзе нас было ўжо каля 5 тысяч — а гэта ўжо дывізія. Мы разлічваем стварыць цёплую душэўную брацкую абстаноўку аднадумцаў, якія з франтавымі песнямі ля вогнішча будуць распавядаць пра сваіх сваякоў і, успамінаючы аб тых страшных гадах, сустракаць самае светлае свята для нашага народа", — распавёў каардынатар праекта.
Лагер будзе знаходзіцца на тэрыторыі кемпінга ў равеліне №2 Брэсцкай крэпасці. Ён можа размясціць да 800 чалавек. На тэрыторыю ўжо праведзена электрычнасць, будуць арганізаваны месцы для мыцця, туалет, курыльня і падача пітной вады.
"Гэта тая тэрыторыя, дзе ў 65-м годзе адбыўся I Усесаюзны злёт пераможцаў паходу моладзі па месцах баявой славы савецкага народа. Тут збіраліся людзі з усяго СССР. Начальнікам лагера быў маршал Конеў. Такі ўзровень быў на гэтай зямлі — не хапала ўсім месца. Таму праект мае практычна неабмежаваныя перспектывы", — лічыць Піцко.
Некалькі мастацкіх калектываў ужо падалі заяўкі для выступу перад прысутнымі. Адзін з іх выказаў жаданне правесці ў лагеры ноч.
