МІНСК, 7 мая — Sputnik. Больш за 26 тысяч чалавек займаліся навуковымі даследаваннямі і распрацоўкамі ў Беларусі ў 2017 годзе, паведаміў Белстат.
Колькасць навучэнцаў-аспірантаў склала 5,1 тысячы чалавек, у дактарантуры праходзілі навучанне 503 чалавекі. Дактарамі навук у 2017 годзе сталі 46 чалавек, кандыдатамі навук — 452 чалавекі. Усяго навуковую ступень у Беларусі мае пятая частка даследчыкаў.
Дактароў навук у краіне 645 чалавек, кандыдатаў навук — 2850, пры гэтым жанчыны абараняюць дысертацыі радзей, чым мужчыны. У агульнай колькасці даследчыкаў жанчыны склалі 40%, з іх дактароў навук 18%.
Больш за ўсё сярод беларускіх даследчыкаў навукоўцаў у сферы тэхнічных і натуральных навук. Актыўна ўцягнутыя ў гэтую дзейнасць маладыя людзі.
Нагадаем, што год навукі быў абвешчаны ў краіне ў 2017 годзе. За гэты час у Беларусі прайшлі сёмы Беларускі касмічны кангрэс, першы беларускі філасофскі кангрэс "Нацыянальная філасофія ў глабальным свеце", кангрэс "500 гадоў беларускага кнігадрукавання" і іншыя мерапрыемствы. Сярод найбуйнейшых распрацовак — беларускі суперкамп'ютэр, які пераўзыходзіць па магутнасці суперкамп'ютэр"СКІФ" пры меншых габарытах. Вялася праца над праектам электрамабіля і малога персанальнага электратранспарту, навукоўцы таксама распрацоўвалі ўласны назапашвальнік энергіі, які здольны хутка зараджацца і зручны для электратранспарту.
