МІНСК, 9 мая — Sputnik. Расчараваныя няўдалымі вынікамі выступлення Alekseev у паўфінале "Еўрабачання" фанаткі артыста абвяшчаюць пра рашэнне больш не глядзець гэты конкурс.
Першы паўфінал "Еўрабачання 2018" адбыўся напярэдадні ў Лісабоне. Па выніках галасавання тэлегледачоў і прафесійнага журы вызначыліся першыя фіналісты конкурсу: прадстаўнікі Аўстрыі, Эстоніі, Кіпра, Літвы, Ізраіля, Чэхіі, Балгарыі, Албаніі, Фінляндыі і Ірландыі. У той жа час, прадстаўнік Беларусі, украінскі поп-спявак Alekseev прайсці ў фінал шоу не змог.
Сам выканаўца пакуль ніяк не пракаментаваў сваё фіяска ў паўфінале, аднак яго прыхільніцы і прыхільнікі ўжо зрабілі свае высновы. "Ды "Еўрабачанне" даўно ўжо ніхто не глядзіць, а вынікі ўспрымаюць як 100% анекдот", — напісала ў суполцы артыста Надзея з Новасібірска.
"Вельмі шкада, прайшлі больш слабыя. Уяўляю, што ён адчувае і як яму крыўдна. Выдатны нумар, ты быў лепшым з канкурсантаў. Для нас ты ўсё роўна пераможца! Але "Еўрабачанне" — гэта не зусім конкурс пра талент і музыку, там больш замяшаная палітыка", — выказала меркаванне прыхільніца Алена.
Хтосьці з фанатаў абвінаваціў Еўропу ў "апушчаным гусце" і дадаў, што ўсё на конкурсе вырашаюць "вялікія грошы".
"Голас прыгожы, нумар шыкоўны, з глыбокім сэнсам. Не разумею гэтых "суддзяў": што магло не спадабацца?" — задалася пытаннем Анастасія з Нарыльска.
Некаторыя прыхільніцы артыста і зусім заклікаюць больш не глядзець "Еўрабачанне" — з-за таго, што там "ні густу, ні мазгоў".
У той жа час, у каментарах у афіцыйных суполках артыста знаходзяцца і тыя, хто прызнаюць: праспяваў Alekseev не вельмі добра, ды і нумар мог быць менш банальным. Зрэшты, такіх тут не так шмат — на іх адразу "накідваюцца" адданыя фанаты.
За 15 гадоў удзелу Беларусі ў міжнародным конкурсе песні "Еўрабачанне" прадстаўнікі рэспублікі выходзілі ў фінал шоу толькі пяць разоў. Самае высокае месца на сёння — шостае ў 2007 годзе ў Дзмітрыя Калдуна.
