МІНСК, 30 траўня - Sputnik. Прэзідэнт Беларусі Аляксандр Лукашэнка накіраваў віншаванне лётчыку-касманаўту, двойчы Герою Савецкага Саюза Аляксею Лявонаву, які адзначае 85-гадовы юбілей, паведамілі Sputnik у прэс-службе кіраўніка дзяржавы.
"Некалькі пакаленняў хлопчыкаў і дзяўчынак, гледзячы на Вас, пераканаліся, што мэтанакіраванасць і ўпартая праца прыводзяць да выканання самай смелай мары", - гаворыцца ў віншаванні.
Лукашэнка адзначыў, што ў Беларусі памятаюць і паважаюць Лявонава як годнага прадстаўніка атрада касманаўтаў, які першым крочыў у адкрыты космас. Таксама беларускі лідар адзначыў і ўнёсак Лявонава ў папулярызацыю касманаўтыкі.
"Навукова-папулярныя кнігі і жывапісныя палотны распавядаюць жыхарам Зямлі пра засваенне дзіўнага і бязмежнага Сусвету, адначасова нагадваючы пра тое, якой выдатнай з'яўляецца наша родная планета", - абвяшчае тэкст віншавання.
Дарэчы, адну з карцін, напісаных Лявонавым, падарылі Лукашэнку падчас міжнароднага касмічнага кангрэса ў верасні мінулага года. Прэзідэнт тады паабяцаў, што карціна зойме сваё пачэснае месца ў Палацы Незалежнасці.
Лукашэнка таксама пажадаў касманаўту моцнага здароўя, творчых поспехаў і дасягнення новых вышынь.
